ഹൃത്വിക് റോഷൻ നായകനായി എത്തിയ ഫൈറ്റർ ഒടിടി റിലീസിന് തയ്യാറെടുക്കുന്നു. ബോക്സ് ഓഫീസിൽ വൻ വിജയമായിരുന്നു ഈ ചിത്രം. ആഗോള ബോക്സ് ഓഫീസിൽ 336 കോടി രൂപയിലധികം നേടിയ ചിത്രമാണിത്. ദീപിക പദുക്കോൺ ആണ് ചിത്രത്തിലെ നായിക. നെറ്റ്ഫ്ളിക്സാണ് ഫൈറ്റർ എന്ന ചിത്രത്തിന്റെ ഒടിടി റൈറ്റ്സ് നേടിയിരിക്കുന്നത്. ഇംഗ്ലീഷ് ജാഗ്രണിന്റെ റിപ്പോർട്ട് 150 കോടിക്കാണ് ഒടിടി റൈറ്റ്സ് നെറ്റ്ഫ്ളിക്സ് നേടിയതെന്നാണ് വിവരം.
എപ്പോഴായിരിക്കും ഒടിടിയിൽ റിലീസെന്ന് വ്യക്തമല്ല. വൈകാതെ ഹൃത്വിക് റോഷന്റെ ഫൈറ്റർ ഒടിടിയിൽ എത്തും എന്നാണ് പ്രതീക്ഷിക്കപ്പെടുന്നത്. സിദ്ധാർഥ് ആനന്ദാണ് സംവിധാനം നിർവഹിച്ചത്. അനിൽ കപൂറും ഒരു പ്രധാനപ്പെട്ട കഥാപാത്രത്തെ അവതരിപ്പിക്കുന്നുണ്ട്. ഫൈറ്ററിൽ സഞ്ജീദ ഷെയ്ക്കും അഭിനയിച്ചിട്ടുണ്ട്.
സത്ചിത് പൗലോസാണ് ചിത്രത്തിന്റെ ഛായാഗ്രാഹണം. ഹൃത്വിക് റോഷൻ നായകനായി മുമ്പെത്തിയ ചിത്രം വിക്രം വേദയാണ്. തമിഴ് പ്രേക്ഷകരെ അമ്പരപ്പിച്ച ഒരു ചിത്രമായ വിക്രം വേദയുടെ അതേ പേരിലുള്ള ഹിന്ദി റീമേക്കിലായിരുന്നു ഹൃത്വിക് റോഷൻ നായകനായി എത്തിയത്. സംവിധാനം പുഷ്കർ- ഗായത്രി ദമ്പതിമാരാണ്. ഹൃത്വിക് റോഷനു പുറമേ ഹിന്ദി ചിത്രത്തിൽ സെയ്ഫ് അലിഖാൻ, രാധിക ആംപ്തെ, രോഹിത്ത് സറഫ്, യോഗിത ബിഹാനി, ഷരീബ് ഷാഷ്മി തുടങ്ങിയവരും കഥാപാത്രങ്ങളെ അവതരിപ്പിച്ചിരുന്നു.