വയനാട്: വയനാട് വർക്കേഷന് പറ്റിയ മികച്ച ഇടമാണെന്ന് മന്ത്രി പി എ മുഹമ്മദ് റിയാസ്. ഇക്കാര്യത്തിൽ വയനാടിന്റെ സാധ്യതയെ ഉപയോഗപ്പെടുത്തുമെന്നും അദ്ദേഹം പറഞ്ഞു.
വിനോദസഞ്ചാര കേന്ദ്രങ്ങളിൽ താമസിച്ച് ജോലിചെയ്യുന്ന വർക്കേഷൻ ഒരുക്കുന്നതിനുള്ള പദ്ധതി കെടിഡിസി ഇപ്പോൾ സംസ്ഥാനതലത്തിൽ തന്നെ ആരംഭിക്കുന്നുണ്ട്. അതിൽ വയനാട്ടിൽ എന്തൊക്കെ ചെയ്യാനാകുമെന്ന് പരിശോധിക്കും. കോവിഡനന്തര ടൂറിസത്തിൽ ഏറ്റവും കൂടുതൽ ശ്രദ്ധിക്കപ്പെട്ട ഒരു ട്രെൻഡായിരുന്നു വർക്കേഷൻ. കോവിഡിനുശേഷം ടൂറിസം പ്രവർത്തനങ്ങൾ ആരംഭിക്കുന്ന ഘട്ടത്തിൽ ഞങ്ങൾ വയനാടിനുമാത്രമായി പ്രത്യേകമായ കാമ്പയിൻ നടത്തിയിരുന്നുവെന്നും അദ്ദേഹം ചൂണ്ടിക്കാട്ടി.
ബെംഗളൂരു കേന്ദ്രീകരിച്ചായിരുന്നു ആ കാമ്പയിൻ. വയനാട്ടിൽ വന്നു താമസിക്കാമെന്നും സുരക്ഷിതമായി, ശാന്തമായി ജോലിചെയ്യാമെന്നുമാണ് നമ്മൾ മുന്നോട്ടുവെച്ചതെന്ന് അദ്ദേഹം ഒരു സ്വകാര്യ മാദ്ധ്യമത്തോട് വെളിപ്പെടുത്തി.