തിരുവനന്തപുരം: വന്ദേഭാരത് എക്സ്പ്രസിന്റെ സമയക്രമത്തിൽ മാറ്റം. തിരുവനന്തപുരത്ത് നിന്ന് കോട്ടയം വഴി കാസർകോട്ടേക്കും തിരിച്ചും സർവീസ് നടത്തുന്ന വന്ദേഭാരത് എക്സ്പ്രസിന്റെ സർവ്വീസിലാണ് മാറ്റം വരുത്തിയത്. ചെങ്ങന്നൂരിൽ അധിക സ്റ്റോപ്പ് അനുവദിച്ചതിനെ തുടർന്നാണ് സമയക്രമത്തിൽ മാറ്റംവന്നത്.
തിരുവനന്തപുരം, കൊല്ലം, തൃശ്ശൂർ എന്നീ സ്റ്റേഷനുകളിലെ സമയക്രമത്തിലാണ് മാറ്റമുള്ളത്. ഒക്ടോബർ 23 മുതൽ പുതിയ സമയക്രമം നടപ്പിൽവരും. തിരുവനന്തപുരത്തു നിന്ന് രാവിലെ 5.20ന് പുറപ്പെട്ടിരുന്ന വന്ദേഭാരത് ഇനി മുതൽ 5.15നായിരിക്കും സർവീസ് ആരംഭിക്കുക. ട്രെയിൻ 6.03ന് കൊല്ലത്തെത്തും. 6.05ന് ഇവിടെനിന്നും പുറപ്പെടുന്ന ട്രെയിൻ 6.53ന് ചെങ്ങന്നൂരിലെത്തും. 6.55നാണ് ട്രെയിൻ ഇവിടെ നിന്നും യാത്ര തിരിക്കുക.
അതേസമയം, കോട്ടയത്തും എറണാകുളത്തും ട്രെയിൻ എത്തുന്ന സമയത്തിലും പുറപ്പെടുന്ന സമയത്തിലും മാറ്റമില്ല. തൃശ്ശൂരിലും ട്രെയിൻ എത്തിച്ചേരുന്ന സമയവും മാറില്ല. എന്നാൽ 9.30ന് എത്തുന്ന ട്രെയിൻ ഒരു മിനിറ്റ് അധികം ഇവിടെ നിർത്തും. 9.33നാണ് ഇനി മുതൽ ട്രെയിൻ തൃശ്ശൂരിൽ നിന്ന് പുറപ്പെടുന്നത്. കാസർേഗാഡ് എത്തുന്നത് വരെയുള്ള സ്റ്റേഷനുകളിലെ സമയക്രമത്തിൽ മാറ്റമുണ്ടാകില്ലെന്നും റെയിൽവേ അറിയിച്ചു.
തിരിച്ചുള്ള സർവീസിൽ കാസർകോട് മുതൽ ഷൊർണൂർ വരെ സമയത്തിൽ മാറ്റമില്ല. തൃശ്ശൂരിൽ ഒരു മിനിറ്റ് അധികം നിർത്തും. 6.13നാണ് ഇവിടെനിന്നും ട്രെയിൻ തിരിക്കുക. കോട്ടയത്തും എറണാകുളത്തും സമയത്തിൽ മാറ്റമില്ല. ചെങ്ങന്നൂരിൽ 8.46ന് ട്രെയിൻ എത്തും. രണ്ട് മിനിറ്റ് കഴിഞ്ഞ് 8.48ന് പുറപ്പെടും. 9.34ന് കൊല്ലത്തെത്തുന്ന ട്രെയിൻ 9.36ന് ഇവിടെ നിന്നും തിരിക്കും. വന്ദേഭാരത് എക്സ്പ്രസ് തിരുവനന്തപുരത്ത് എത്തിച്ചേരുക 10.40നാണ്.