സിപിഎം മുതിര്ന്ന നേതാവും സിഐടിയു സംസ്ഥാന പ്രസിഡന്റുമായ ആനത്തലവട്ടം ആനന്ദന് (86)അന്തരിച്ചു. തിരുവനന്തപുരം മെഡിക്കല് കോളജില് വച്ചായിരുന്നു അന്ത്യം. രോഗബാധയെ തുടര്ന്ന് കുറച്ചു നാളുകളായി ചികിത്സയിലായിരുന്നു. വിടവാങ്ങിയത് ഏഴ് പതിറ്റാണ്ട് തൊഴിലാളികൾക്കായി പോരാടിയ നേതാവ്. 1987, 1996, 2006 എന്നീ വർഷങ്ങളിൽ ആറ്റിങ്ങലിൽ നിന്ന് നിയമസഭയിലെത്തി. സിപിഎം സംസ്ഥാന സെക്രട്ടറിയെറ്റ് അംഗം എന്ന നിലയിലും പ്രവർത്തിച്ചിട്ടുണ്ട്.
22 ഏപ്രില് 1937 ന് തിരുവനന്തപുരം ജില്ലയിലെ വര്ക്കല ചിലക്കൂരില് കേടുവിളാകത്ത് വിളയില് നാരായണിയുടെയും വി.കൃഷ്ണന്റെയും മകനായി ജനിച്ചു. 1954ല് ഒരണ കൂടുതല് കൂലിക്കു വേണ്ടി നടന്ന കയര് തൊഴിലാളി പണിമുടക്ക് ആനന്ദന് രാഷ്ട്രീയത്തിലേക്കും സാമൂഹിക പ്രവര്ത്തനത്തിലേക്കുമുള്ള ആദ്യ പടിയായി. ട്രാവന്കൂര് കയര് വര്ക്കേഴ്സ് യൂണിയന് മാനേജിംഗ് കമ്മിറ്റി അംഗം, മറ്റു പ്രാദേശിക യൂണിയനുകളുടെ ഭാരവാഹി എന്ന നിലയില് അദ്ദേഹം പ്രവര്ത്തിച്ചു.
1956ല് കമ്മ്യൂണിസ്റ്റ് പാര്ട്ടിയില് അംഗം ആയി. പാര്ട്ടി പിളര്ന്നപ്പോള് സിപിഎമ്മിനൊപ്പം ചേര്ന്നു.1971ല് സിപിഎം ജില്ലാ കമ്മിറ്റി അംഗം, ട്രാവന്കൂര് കയര് തൊഴിലാളി യൂണിയന് ജനറല് സെക്രട്ടറി, കേരള കയര് വര്ക്കേഴ്സ് സെന്റര് ജോയിന്റ് സെക്രട്ടറി എന്നീ പദവികള് വഹിച്ചു. 1972ല് കേരള കയര് വര്ക്കേഴ്സ് സെന്റര് സെക്രട്ടറിയും ആയിരുന്നു.