കണ്ണൂര്: കണ്ണൂര് റെയില്വേ സ്റ്റേഷനില് നിര്ത്തിയിട്ടിരുന്ന ട്രെയിനിന് തീ പിടിച്ച സംഭവത്തില് അന്യസംസ്ഥാനക്കാരനായ ഒരാള് കസ്റ്റഡിയില്. ഇയാളുടെ അറസ്റ്റ് ഉടനുണ്ടാകുമെന്നാണ് സൂചന. സി സി ടി വി ദൃശ്യങ്ങളില് കണ്ടയാളെയാണ് പോലീസ് കസ്റ്റഡിയില് എടുത്തിരിക്കുന്നത്. മുന്പ് സ്റ്റേഷന് പരിസരത്ത് തീയിട്ടതും ഇയാള് തന്നെയാണ്. ഇയാളുടെ വിരലടയാളം പരിശോധിക്കുന്നുണ്ട്.
റെയില്വേ സ്റ്റേഷന്റെ മൂന്നാം പ്ലാറ്റ് ഫോമിന് സമീപത്തായി ഏട്ടാമത്തെ യാര്ഡില് നിര്ത്തിയിട്ടിരുന്ന ആലപ്പുഴ – കണ്ണൂര് എക്സിക്യൂട്ടീവ് എക്സ്പ്രസ് ട്രെയിനിന്റെ ബോഗിക്കാണ് പുലര്ച്ചെ ഒന്നരയോടെ തീപ്പിടിച്ചത്. രാത്രി പതിനൊന്നേ മുക്കാലിന് യാത്ര അവസാനിപ്പിച്ചശേഷം നിറുത്തിയിട്ടിരിക്കുകയായിരുന്നു ട്രെയിന്. ബോഗി തീ പിടിച്ച സ്ഥലത്തിന് വെറും നൂറുമീറ്റര് അകലെ ഇന്ത്യന് ഓയില് കോര്പ്പറേഷന്റെ ഇന്ധന സംഭരണ കേന്ദ്രം ഉണ്ട്.
അതേസമയം, എലത്തൂര് ട്രെയിന് തീവയ്പ്പിന് സമാനമായ സംഭവമാണ് കണ്ണൂരില് ഉണ്ടാതെന്നാണ് എന് ഐ എയുടെ പ്രാഥമിക നിഗമനം. ബോഗിയിലേക്ക് ഒരാള് കയ്യില് ക്യാനുമായി പോകുന്ന സി സി ടി വി ദൃശ്യങ്ങള് ലഭിച്ചിട്ടുണ്ട്. ആദ്യം ബോഗിക്കുള്ളില് പുക കണ്ടെന്നും എന്നാല് പൊടുന്നനെ ബോഗിയില് ഒന്നാകെ തീ ആളിപ്പടരുകയുമായിരുന്നു എന്നാണ് ദൃക്സാക്ഷികള് പറയുന്നത്.