അമ്മയേക്കുറിച്ച് മോശം കാര്യങ്ങള് പ്രചരിപ്പിക്കരുതെന്ന് അഭ്യര്ത്ഥിച്ച് നടി മീനയുടെ മകള് നൈനിക. അമ്മയും ഒരു മനുഷ്യസ്ത്രീയാണെന്നും അവര്ക്കും ഒരു ജീവിതമുണ്ടെന്നും നൈനിക പറയുന്നു. സിനിമാരംഗത്ത് നാല്പത് വര്ഷം പൂര്ത്തിയാക്കിയ വേളയില് ഈയിടെ മീന തന്റെ സഹപ്രവര്ത്തകര്ക്കും സുഹൃത്തുക്കള്ക്കുമായി ഒരു ഗെറ്റ് റ്റുഗെദര് സംഘടിപ്പിച്ചിരുന്നു. ഈ ചടങ്ങില് വെച്ച് മീനയുടെ മകളും ബാലതാരവുമായ നൈനിക പറഞ്ഞ കാര്യം ചര്ച്ചയാവുകയാണ്.
‘അമ്മ എന്ന നിലയിലും അഭിനേത്രി എന്ന നിലയിലും അമ്മയെ ഓര്ത്ത് ഞാന് വളരെയേറെ അഭിമാനിക്കുന്നുണ്ട്. അച്ഛന്റെ മരണശേഷം അമ്മ എത്രത്തോളം സങ്കടപ്പെടുന്നുണ്ടെന്ന് എനിക്കറിയാം. അച്ഛന്റെ മരണശേഷം അമ്മ ഏറെ വിഷാദത്തിലായിരുന്നു. കരയുന്നത് കണ്ടിട്ടുണ്ട്. അതിനിടയിലാണ് വ്യാജ വാര്ത്തകള് എത്തുന്നത്. എനിക്കു വേണ്ടിയെങ്കിലും ഇത്തരം വാര്ത്തകള് എഴുതുന്നത് നിര്ത്തണമെന്ന് അപേക്ഷിക്കുകയാണ്. അഭിനേത്രി എന്നതിലുപരി അമ്മയും ഒരു മനുഷ്യസ്ത്രീയാണ്, അവര്ക്കും വികാരങ്ങളുണ്ട്’-നൈനിക പറയുന്നു.
വിജയ് നായകനായ തെറി എന്ന ചിത്രത്തിലൂടെയാണ് നൈനിക സിനിമയിലെത്തിയത്. മലയാളത്തില് ബ്രോ ഡാഡി എന്ന ചിത്രത്തിലാണ് മീന ഒടുവില് അഭിനയിച്ചത്.