മലയാള സിനിമാ സംഘടനകൾക്കിടയിലെ വിവാദം അവസാനിക്കുമെന്ന സൂചന. ഫിലിം ചേംബർ പ്രസിഡന്റ് ബി.ആർ. ജേക്കബ് നിർമാതാവ് ആന്റണി പെരുമ്പാവൂരുമായി നടത്തിയ ചര്‍ച്ചയ്ക്ക് പിന്നാലെ, നിർമാതാവ് ജി. സുരേഷ് കുമാറിനെ വിമർശിച്ച ഫേസ്ബുക്ക് കുറിപ്പ് ആന്റണി പിന്‍വലിച്ചു.
ഫിലിം ചേംബർ മാർച്ചിൽ പണിമുടക്ക് പ്രഖ്യാപിക്കാനൊരുങ്ങുന്നില്ലെന്നും എമ്പുരാൻ തിയറ്റർ ഉടമകൾ ആകാംക്ഷയോടെ കാത്തിരിക്കുന്ന ചിത്രം തന്നെയാണെന്നും ചേംബർ പ്രസിഡന്റ് വ്യക്തമാക്കി.
സിനിമാ സമരവുമായി ബന്ധപ്പെട്ട് ജി. സുരേഷ് കുമാർ നടത്തിയ വാര്‍ത്താ സമ്മേളനത്തിന്‍റെ പശ്ചാത്തലത്തിൽ, എമ്പുരാൻ സിനിമയുടെ ബജറ്റിനെ കുറിച്ചുള്ള പരാമർശമാണ് തന്നെ വേദനിപ്പിച്ചതെന്ന് ആന്റണി പെരുമ്പാവൂർ ബി.ആർ. ജേക്കബിനോട് വ്യക്തമാക്കിയിരുന്നു. തന്റെ പ്രതികരണം പ്രൊഡ്യൂസേഴ്സ് അസോസിയേഷനുമായി ആലോചിച്ച ശേഷമാണെന്നും അദ്ദേഹം കൂട്ടിച്ചേർത്തു.
എമ്പുരാന്റെ ബജറ്റിനെക്കുറിച്ചുള്ള പരാമർശം തിരുത്തിയതായി സൂചിപ്പിച്ച ചേംബർ പ്രസിഡന്റിനോട്, തന്റെ പോസ്റ്റ് പിന്‍വലിക്കാൻ തയ്യാറാണെന്ന് ആന്റണി വ്യക്തമാക്കിയതോടെ തർക്കം ശമിക്കുമെന്ന പ്രതീക്ഷ ശക്തമായി. ചേംബർ എമ്പുരാൻ സിനിമയോട് പ്രതികാര നടപടിയുണ്ടാകില്ലെന്നും സ്ഥിരീകരിച്ചു.
അതേസമയം, ഫിയോക്ക് ഉൾപ്പെടെയുള്ള സംഘടനകൾ സർക്കാർ തലത്തിൽ ചർച്ച നടത്തി പ്രശ്‌നം ഒരാഴ്ചയ്ക്കകം പരിഹരിക്കുമെന്നാണ് അറിയിച്ചിരിക്കുന്നത്.