ശബരിമല ദർശനത്തിനായി രാഷ്ട്രപതി ദ്രൗപദി മുർമു എത്തുന്നു. ഇത് ആദ്യമായിരിക്കും ഒരു ഇന്ത്യൻ രാഷ്ട്രപതി ശബരിമല സന്ദർശിക്കുന്നത്. മേയ് 18-ന് കേരളത്തിലെത്തുകയും 18,19 തീയതികളിൽ രാഷ്ട്രപതി കേരളത്തിൽ ഉണ്ടാകാൻ സാധ്യതയെന്നാണ് റിപ്പോർട്ടുകൾ.
ഇടവമാസ പൂജകൾക്കായി ശബരിമല നട തുറക്കുന്ന അവസരത്തിൽ രാഷ്ട്രപതിയുടെ വരവിനായി പോലീസിനും തിരുവിതാംകൂർ ദേവസ്വം ബോർഡിനും മുൻകൂട്ടി അനൗദ്യോഗിക അറിയിപ്പ് ലഭിച്ചിട്ടുണ്ട്. രാഷ്ട്രപതിയുടെ താമസസ്ഥലമായി കോട്ടയത്തുള്ള കുമരകം തിരഞ്ഞെടുക്കപ്പെട്ടിട്ടുണ്ട്.
രാഷ്ട്രപതിയുടെ സന്ദർശനത്തിനാവശ്യമായ ഒരുക്കങ്ങൾക്കായി സംസ്ഥാന സർക്കാർ നടപടികൾ ആരംഭിച്ചിട്ടുണ്ടെന്നും സർക്കാർ വൃത്തങ്ങൾ അറിയിച്ചു. സന്ദർശന ദിവസങ്ങളിൽ ശബരിമലയിലേക്കുള്ള പ്രവേശനത്തിൽ നിയന്ത്രണങ്ങൾ ഏർപ്പെടുത്തുന്നതായും ദേവസ്വം ബോർഡ് അറിയിച്ചിട്ടുണ്ട്. വെർച്വൽ ക്യൂ ബുക്കിംഗിലടക്കം പുതിയ നിയന്ത്രണങ്ങൾ ഉണ്ടായേക്കും.
ഇടവമാസ പൂജകൾക്കായി മേയ് 14-ന് ശബരിമല നട തുറക്കാൻ പോകുന്നതിനിടയിലാണ് രാഷ്ട്രപതിയുടെ വരവ് നടക്കുന്നത്. ഇതിന്റെ ഭാഗമായി ശബരിമലയിലെ വിവിധ നിർമാണ, സംരക്ഷണ പ്രവർത്തനങ്ങൾ വേഗത്തിലാക്കുകയും ചെയ്തിട്ടുണ്ട്.