പ്രയാഗ്‌രാജ്: മഹാകുംഭമേളയിൽ പങ്കെടുക്കാനായി പ്രധാനമന്ത്രി നരേന്ദ്ര മോദി പ്രയാഗ്‌രാജിലെത്തി. രാവിലെ പ്രത്യേക ബോട്ടിലൂടെയാണ് അദ്ദേഹം ത്രിവേണി സംഗമത്തിലെത്തിയത്. തുടര്‍ന്ന് ഗംഗാ ദേവിയെ പ്രാർത്ഥിച്ച് പുണ്യസ്നാനം നടത്തി. സ്നാനത്തിനിടെ ട്രാക്ക് പാന്റും കാവി ജാക്കറ്റും ധരിച്ച പ്രധാനമന്ത്രി കയ്യിൽ രുദ്രാക്ഷമാലയുമായി ആചാരങ്ങൾ പാലിച്ചു.
പ്രധാനമന്ത്രിയുടെ സന്ദർശനത്തിനെത്തുടർന്ന് നഗരത്തിൽ കർശന സുരക്ഷാ നടപടികൾ നടപ്പാക്കിയിരുന്നു.സംസ്ഥാന സർക്കാരിലെ നിരവധി മന്ത്രിമാരും പ്രധാനമന്ത്രിയെ അനുഗമിച്ചു.
കുംഭമേളയ്ക്കിടെ പുണ്യസ്നാനത്തിനായി പരമ്പരാഗതമായി ബസന്ത് പഞ്ചമി, മൗനി അമാവാസി തുടങ്ങിയ ശുഭദിനങ്ങളാണ് പ്രധാനമായും തിരഞ്ഞെടുക്കപ്പെടുന്നത്. എന്നാൽ ഫെബ്രുവരി 5 അതിന്റെ പ്രത്യേക ആത്മീയ പ്രാധാന്യത്തെക്കൊണ്ടു വേറിട്ടുനിൽക്കുന്നു. ഹിന്ദു കലണ്ടറിൽ പുണ്യദിനമായി കണക്കാക്കപ്പെടുന്ന മാഘാഷ്ടമിയുമായി സംഗമിക്കുന്ന ദിനമാണിത്. ഇതുതന്നെയാണ് പ്രധാനമന്ത്രി പുണ്യസ്നാനത്തിനായി തെരഞ്ഞെടുത്തതും. പ്രധാനമന്ത്രിയുടെ സന്ദർശനത്തിന് മുന്നോടിയായി പ്രത്യേക സജ്ജീകരണങ്ങളും സുരക്ഷാ ക്രമീകരണങ്ങളും ഒരുക്കിയിരുന്നു.