ഇടുക്കി: പാചകത്തിനിടെ ഗ്യാസ് സിലിണ്ടറിൽ നിന്നും തീ പടർന്ന് നാല് പേർക്ക് പൊള്ളലേറ്റു. കാറ്ററിംഗ് സ്ഥാപനനത്തിൽ വെച്ചാണ് സംഭവം. തോക്കുപാറ സ്വദേശികളായ ജോയി, ജോമോൻ, അഖില, അന്നമ്മ എന്നിവർക്കാണ് പൊള്ളലേറ്റത്. തോക്കുപാറ സൗഹൃദഗിരിയിൽ പ്രവർത്തിക്കുന്ന കാറ്ററിംഗ് യൂണിറ്റിൽ പാചകത്തിനിടെ ഗ്യാസ് കുറ്റിയിൽ തീ പടർന്നാണ് പൊള്ളലേറ്റത്.
പാചകത്തിനിടെ ഗ്യാസ് സിലിണ്ടറിൽ തീ പിടിക്കുകയും തുടർന്ന് ആളിപ്പടരുകയുമായിരുന്നു. സമീപത്ത് ഉണ്ടായിരുന്നവർ ഉടൻ തീ അണച്ചതിനാൽ വലിയ ദുരന്തം ഒഴിവായത്. സംഭവസ്ഥലത്ത് ഉണ്ടായിരുന്ന നാല് പേരുടെയും ശരീരത്തിൽ പൊള്ളലേറ്റു. പരിക്കേറ്റ നാല് പേരെയും ഉടൻ അടിമാലി താലൂക്ക് ആശുപത്രിയിൽ എത്തിച്ച് ചികിത്സ ലഭ്യമാക്കി. ആരുടെയും പൊള്ളൽ ഗുരുതരമല്ലെന്ന് ആശുപത്രി അധികൃതർ അറിയിച്ചു.