തനിക്ക് ഏറ്റവും ഇഷ്ടപ്പെട്ട ഭക്ഷണത്തെക്കുറിച്ച് തുറന്നു പറഞ്ഞ് ബോളിവുഡ് നടി കരീന കപൂർ. തന്റെ ബിരിയാണി പ്രേമത്തെ കുറിച്ചാണ് കരീന കപൂർ വാചാലയായത്. ഈ ബിരിയാണി പ്രേമം കുടുംബപരമായി കൈമാറി കിട്ടിയതാണെന്ന് കരീന വ്യക്തമാക്കി. ഡൽഹിയിൽ നടന്ന ഒരു പരിപാടിക്കിടെയായിരുന്നു കരീനയുടെ പരാമർശം.
കപൂർ കുടുംബത്തിൽ തനിക്ക് മാത്രമല്ല എല്ലാവർക്കും ബിരിയാണിയോടു ഇഷ്ടമുണ്ടെന്ന് താരം വ്യക്തമാക്കി. ബുഖാര ഹോട്ടലിലെ ഭക്ഷണമാണ് ഡൽഹിയിൽ ഏറ്റവും ഇഷ്ടപ്പെടുന്നത്. ചാന്ദിനി ചോക്കിലെ ചെറിയ ഭക്ഷണശാലകൾ തനിക്ക് ഏറ്റവും പ്രിയപ്പെട്ടതാണ്. എന്നാൽ അങ്ങോട്ടേക്ക് പോകാൻ ഇപ്പോൾ കുറച്ചുനാളുകളായി സാധിക്കുന്നില്ലെന്നും താരം ചൂണ്ടിക്കാട്ടി.
ഡൽഹിയിലെ ആലൂ പറാത്തയും, ചോലെ ബട്ടൂരെയും എല്ലാം തന്റെ ഇഷ്ടവിഭവങ്ങളുടെ ലിസ്റ്റിൽ ഇടം പിടിച്ചവയാണെന്നും കരീന കപൂർ കൂട്ടിച്ചേർത്തു. കരീനയുടെ ബിരിയാണിപ്രിയത്തെ കുറിച്ച് ആരാധകർക്ക് നേരത്തെ തന്നെ അറിയാം. ചെറുപ്രായത്തിൽ മുതൽ താൻ ഏറ്റവും അധികം ഇഷ്ടപ്പെടുന്ന ഒന്നാണ് ബിരിയാണി എന്ന് സമൂഹമാധ്യമത്തിൽ പങ്കുവച്ച മിക്ക ചിത്രങ്ങളിലും കരീന വ്യക്തമാക്കിയിട്ടുണ്ട്.