കൊച്ചി: ലോകപ്രശസ്ത കമ്പനിയായ HCLTech കേരളത്തിൽ അവരുടെ ആദ്യ യൂണിറ്റ് ആരംഭിച്ചു. വ്യവസായ മന്ത്രി പി രാജീവാണ് ഇക്കാര്യം അറിയിച്ചത്. കൊച്ചി ഇൻഫോപാർക്കിൽ ആരംഭിച്ചിരിക്കുന്ന യൂണിറ്റിൽ നിന്ന് ലോകത്തിലെ തന്നെ പ്രമുഖ ഓട്ടോമൊബൈൽ, സെമികണ്ടക്ടർ, മെഡിക്കൽ മേഖലയിലെ കമ്പനികൾക്കും മറ്റ് വ്യവസായങ്ങൾക്കും ആവശ്യമായ എഞ്ചിനീയറിങ്ങ് സഹായങ്ങളും R&D സഹായങ്ങളും ലഭ്യമാക്കും.
60ലധികം രാജ്യങ്ങളിലായി 2,18,000 ജീവനക്കാരുള്ള കമ്പനി കേരളം മുന്നോട്ടുവെക്കുന്ന നൂതന വ്യവസായ മേഖലകളിലെല്ലാം സഹായം ലഭ്യമാക്കാൻ സാധിക്കുന്ന യൂണിറ്റാണെന്നത് സംസ്ഥാനത്തിന് ഗുണകരമായ കാര്യമാണ്. കൊച്ചിയിലേക്കുള്ള HCLTech ന്റെ കടന്നുവരവ് ടെക്നോളജി രംഗത്ത് കേരളത്തിന്റെ സാധ്യതകൾ ഒന്നുകൂടി അടിവരയിടുകയാണ്. കൊച്ചിയിൽ നിർലോഭം ലഭ്യമായിട്ടുള്ള മികച്ച മാനവവിഭവവും പശ്ചാത്തലസൗകര്യവുമാണ് കമ്പനി ഇവിടെ ആരംഭിക്കുന്നതിന് കാരണമായത് എന്ന കമ്പനിയുടെ കോർപ്പറേറ്റ് വൈസ് പ്രസിഡന്റും എഞ്ചിനീയറിങ്ങ് – R&D വിഭാഗം തലവനുമായ ഹരി സാദരഹള്ളിയുടെ വാക്കുകൾ കൂടുതൽ ലോകോത്തര കമ്പനികളുടെ ശ്രദ്ധയാകർഷിക്കുന്നതിന് സഹായകമാകുമെന്നാണ് വിലയിരുത്തപ്പെടുന്നത്.
ആർട്ടിഫിഷ്യൽ ഇന്റലിജൻസ് ഉൾപ്പെടെ നിരവധി മേഖലകളിൽ ഇടപെടുന്ന യൂണിറ്റ് സെമി കണ്ടക്ടർ ചിപ്പ് മേഖലയിലും ശ്രദ്ധേയമായ ഇടപെടൽ നടത്താൻ പ്രാപ്തമായ ഒന്നാണ്. അതുകൊണ്ടുതന്നെ കേരളത്തിൽ HCLTech നൊപ്പം കൂടുതൽ മികച്ച സഹകരണം ഭാവിയിൽ സാധ്യമാകുമെന്നാണ് തങ്ങൾ പ്രതീക്ഷിക്കുന്നതെന്നും മന്ത്രി കൂട്ടിച്ചേർത്തു.