ന്യൂഡൽഹി: വീണ്ടും ജയിലിൽ നിന്നും സന്ദേശവുമായി ഡൽഹി മുഖ്യമന്ത്രി അരവിന്ദ് കെജ്രിവാൾ. ഏകാധിപത്യ സർക്കാരിന്റെ എല്ലാ പീഡനങ്ങളും സഹിക്കാൻ തയാറാണെന്ന് അദ്ദേഹം പറഞ്ഞു. തിഹാർ ജയിലിൽ കഴിയവെയാണ് അദ്ദേഹം സന്ദേശം നൽകിയിരിക്കുന്നത്.
മന്ത്രി ഗോപാൽ റായ് ആണ് കെജ്രിവാൾ ജയിലിൽ നിന്നും നൽകിയ സന്ദേശം മാധ്യമങ്ങൾക്കു മുൻപിൽ പങ്കുവച്ചത്. ജയിലിൽ നിന്നും അരവിന്ദ് കെജ്രിവാൾ രണ്ട് സന്ദേശങ്ങൾ നമുക്കായി നൽകിയിട്ടുണ്ട്. ഡൽഹി നിവാസികൾ യാതൊരു തരത്തിലുമുള്ള പ്രശ്‌നങ്ങൾ അനുഭവിക്കുന്നില്ലെന്ന് സർക്കാരും പാർട്ടിയും ഉറപ്പുവരുത്തണമെന്നാണ് ഒന്നാമത്തെ സന്ദേശം. ഏകാധിപത്യ ഭരണകൂടത്തിന്റെ എല്ലാ പീഡനങ്ങളും അനുഭവിക്കാൻ അദ്ദേഹം തയാറാണെന്ന് രണ്ടാമത്തെ സന്ദേശത്തിൽ പറയുന്നു. ഭരണഘടനയെ സംരക്ഷിക്കുക എന്നതാണ് ഏറ്റവും പ്രധാനപ്പെട്ട കാര്യമെന്നും കെജ്രിവാൾ സന്ദേശത്തിൽ വ്യക്തമാക്കിയിട്ടുണ്ട്.
അതേസമയം, പഞ്ചാബ് മുഖ്യമന്ത്രി ഭഗവന്ത് സിങ് മാനും എംപി സഞ്ജയ് സിങ്ങും ഗോപാൽ റായിയും മറ്റ് ആംആദ്മി പാർട്ടി നേതാക്കളും മുഖ്യമന്ത്രിയുടെ വസതിയിലെത്തി സുനിത കെജ്രിവാളിനെ സന്ദർശിച്ചിരുന്നു.