പത്തനംതിട്ട: പത്തനംതിട്ടയിലെ എൻഡിഎ സ്ഥാനാർത്ഥി അനിൽ ആന്റണിക്കെതിരെ പ്രചാരണത്തിനിറങ്ങില്ലെന്ന് വ്യക്തമാക്കി മുൻ മുഖ്യമന്ത്രി ഉമ്മൻചാണ്ടിയുടെ മകൾ അച്ചു ഉമ്മൻ. ഇതിന്റെ കാരണവും അച്ചു ഉമ്മൻ വ്യക്തമാക്കി. ബാല്യകാലം തൊട്ടുള്ള സുഹൃത്താണ് അനിലെന്നും അതിനാലാണ് അദ്ദേഹത്തിനെതിരെ പ്രചാരണത്തിനിറങ്ങാത്തതെന്നും അച്ചു ഉമ്മൻ പറഞ്ഞുവെന്നാണ് മാദ്ധ്യമങ്ങൾ റിപ്പോർട്ട് ചെയ്യുന്നത്.
ഉമ്മൻചാണ്ടിയുടെ വിശ്വസ്തനായി പരിഗണിക്കുന്ന ആന്റോ ആന്റണിയാണ് പത്തനംതിട്ടയിലെ യുഡിഎഫ് സ്ഥാനാർത്ഥി. യുഡിഎഫിന് ഏറെ വിജയപ്രതീക്ഷയുള്ള മണ്ഡലം കൂടിയാണ് പത്തനംതിട്ട. കോൺഗ്രസിലെ പ്രമുഖ നേതാക്കളായിരുന്ന ഉമ്മൻ ചാണ്ടിയും എ കെ ആന്റണിയും വളരെ അടുത്ത സുഹൃത്തുക്കളായിരുന്നു. ഇവരുടെ കുടുംബങ്ങൾ തമ്മിലും ഈ സൗഹൃദം ഉണ്ടായിരുന്നു.
മണ്ഡലത്തിലെ എൽഡിഎഫ് സ്ഥാനാർത്ഥി മുൻമന്ത്രിയും സിപിഎം നേതാവുമായ തോമസ് ഐസക്ക് ആണ്. ശക്തമായ ത്രികോണ മത്സരമായിരിക്കും പത്തനംതിട്ട മണ്ഡലത്തിൽ ഇത്തവണ ഉണ്ടാകുകയെന്നാണ് വിവരം.