ന്യൂഡൽഹി: 20 സ്‌കൂളുകളുടെ അഫിലിയേഷൻ റദ്ദാക്കിയെന്ന് സിബിഎസ്ഇ. കേരളത്തിലെ രണ്ടു സ്‌കൂളുകളും ഇതിൽ ഉൾപ്പെടുന്നുണ്ട്. സിബിഎസ്ഇ ബോർഡ് ആണ് ഇക്കാര്യം അറിയിച്ചത്. മലപ്പുറം പീവീസ് പബ്ലിക് സ്‌കൂൾ, തിരുവനന്തപുരം മദർ തെരേസാ മെമ്മോറിയൽ സെൻട്രൽ സ്‌കൂൾ എന്നിവയ്ക്കാണ് അംഗീകാരം നഷ്ടമായത്.
അഫിലിയേഷൻ, പരീക്ഷാ ബൈ-ലോ എന്നിവ സംബന്ധിച്ച വ്യവസ്ഥകളും മാനദണ്ഡങ്ങളും പാലിക്കുന്നുണ്ടോ എന്നറിയാൻ വേണ്ടി രാജ്യ വ്യാപകമായി അപ്രതീക്ഷിത പരിശോധനകൾ നടന്നിരുന്നു. ഈ പരിശോധനയിലാണ് 20 സ്‌കൂളുകളിലെ ക്രമക്കേട് കണ്ടെത്തിയത്. പല സ്ഥാപനങ്ങളും ഡമ്മി വിദ്യാർത്ഥികൾക്ക് പ്രവേശനം നൽകുന്നുവെന്നും യോഗ്യതയില്ലാത്ത വിദ്യാർത്ഥികളെ ക്ലാസുകളിൽ ഇരുത്തുന്നുവെന്നും പരിശോധയിൽ കണ്ടെത്തി.
പല സ്ഥാപനങ്ങളും സ്‌കൂൾ രേഖകൾ കൃത്യമായി സൂക്ഷിക്കുന്നില്ലെന്നും സി ബി എസ് ഇ സെക്രട്ടറി ഹിമാൻഷു ഗുപ്ത വ്യക്തമാക്കി. തുടർന്ന് വിശദമായ അന്വേഷണം നടത്തിയ ശേഷമാണ് സ്‌കൂളുകളുടെ അഫിലിയേഷൻ റദ്ദാക്കിയത്. ഡൽഹിയിൽ അഞ്ചും, ഉത്തർപ്രദേശിൽ മൂന്നും രാജസ്ഥാൻ, ഛത്തീസ്ഗഢ്, മഹാരാഷ്ട്ര, കേരളം എന്നിവിടങ്ങളിലെ രണ്ട് വീതവും ജമ്മു കശ്മീർ, ഡെറാഡൂൺ, അസം, മദ്ധ്യപ്രദേശ് എന്നിവിടങ്ങളിൽ നിന്നുള്ള ഓരോ സ്‌കൂളുകളുടെയും അഫിലിയേഷനാണ് റദ്ദാക്കിയത്.