യൂത്ത് കോൺഗ്രസ് സംസ്ഥാന അധ്യക്ഷൻ രാഹുൽ മാങ്കൂട്ടത്തിലിനെതിരെ പരിഹാസവുമായി വിദ്യാഭ്യാസമന്ത്രി വി ശിവൻകുട്ടി. യൂത്ത് കോൺഗ്രസ് സംസ്ഥാന പ്രസിഡണ്ട് രാഹുൽ മാങ്കൂട്ടത്തിൽ സെക്രട്ടറിയേറ്റ് മാർച്ചിലെ സംഘർഷത്തിന്‍റെ പേരിൽ ഇന്നലെ അറസ്റ്റിലായി. കോടതി ജാമ്യം, രാഹുൽ മാങ്കൂട്ടത്തിലിന് നിഷേധിച്ചിരുന്നു. രാഹുലിനെ പൂജപ്പുര സെൻട്രൽ ജയിലിലേക്ക് 22 വരെ റിമാൻഡ് ചെയ്തു മാറ്റി. എന്നാൽ വിഷയത്തിൽ പ്രതികരണവുമായി വി ശിവൻകുട്ടി രംഗത്തെത്തി.
പരിഹാസവുമായി തന്റെ ഫേസ്ബുക്കിലൂടെയാണ് മന്ത്രി രംഗത്തെത്തിയത്. അദ്ദേഹം നടൻ അജിത് കുമാറിന്റെ ചിത്രം ഉൾപ്പെടയുള്ള കുറിപ്പാണ് പങ്കുവച്ചത്. പ്രസിഡന്റ് ജയിലിൽ ആയതറിഞ്ഞ് കേരളത്തിലേക്ക് പുറപ്പെടാൻ തയ്യാറെടുപ്പ് നടത്തുന്ന വോട്ടർ എന്നായിരുന്നു മന്ത്രി കുറിച്ചത്.
യൂത്ത് കോൺഗ്രസ് സംസ്ഥാന തെരെഞ്ഞടുപ്പിൽ നടൻ അജിത്തിന്റെ ഫോട്ടോ ഉപയോഗിച്ചും വ്യാജ ഐ ഡി കാർഡ് നിർമിച്ചതായി പൊലീസ് നേരത്തെ കണ്ടെത്തിയിരുന്നു. ഐ ഡി കണ്ടെത്തിയത് പ്രതി അഭി വിക്രത്തിന്റെ ഫോണിൽ നിന്നാണ്. വോട്ടിംഗിന് ഈ കാർഡ് ഉപയോഗിച്ചിരുന്നോ എന്ന് വ്യക്തമാകണമെങ്കിൽ യൂത്ത് കോൺഗ്രസ് തിരഞ്ഞെടുപ്പ് രേഖകൾ ലഭിക്കണമെന്നാണ് അന്വേഷണ സംഘം വ്യക്തമാക്കുന്നത്.