ഡിസ്ടോപ്പിയൻ എലിയൻ ചിത്രം ഗഗനചാരിയിലെ അഭിനയം കണ്ട് സുരേഷ് ഗോപി വിളിച്ച് അഭിനന്ദനം അറിയിച്ചതായി നടനും മന്ത്രിയുമായ ഗണേഷ് കുമാർ. ‘ നീ നന്നായി ചെയ്തു’ സുരേഷ് ഗോപി ഫോണിൽ വിളിച്ച് അഭിനന്ദിച്ചതായി ഗണേഷ് കുമാർ പറഞ്ഞു. സിനിമയുടെ പ്രമോഷൻ വേളയിലാണ് ഗണേഷ് കുമാർ ഇക്കാര്യം വ്യക്തമാക്കിയത്.
സിനിമ കണ്ട സുരേഷ് ഗോപി തന്നെ ഫോണിൽ വിളിച്ച് അഭിനന്ദിച്ചു. ഒരു സഹപ്രവർത്തകനിൽ നിന്നു കിട്ടുന്ന അഭിനന്ദനം ഒരു കലാകാരനെന്ന നിലയിൽ വളരെ പ്രധാനപ്പെട്ടതാണെന്നും അദ്ദേഹം അഭിപ്രായപ്പെട്ടു.
ഗോകുൽ സുരേഷ്, അജു വർഗീസ്, കെ.ബി ഗണേഷ് കുമാർ, അനാർക്കലി മരക്കാർ, ജോൺ കൈപ്പള്ളിൽ തുടങ്ങിയവർ പ്രധാനവേഷങ്ങളിലെത്തുന്ന ചിത്രമാണ് ഗഗനചാരി. അരുൺ ചന്തുവാണ് ചിത്രത്തിന്റെ സംവിധായകൻ. സുർജിത്ത് എസ് പൈ ആണ് ഛായാഗ്രാഹണം നിർവ്വഹിച്ചിരിക്കുന്നത്. ശങ്കർ ശർമയാണ് സംഗീതം നൽകിയിരിക്കുന്നത്.
കൃഷാന്ദ് ആണ് ഗഗനചാരിയുടെ എക്സിക്യൂട്ടീവ് പ്രൊഡ്യൂസർ. ശിവ സായിയും അരുൺ ചന്തുവും ചേർന്നാണ് ചിത്രത്തിന്റെ തിരക്കഥ ഒരുക്കിയിരിക്കുന്നത്.