നടൻ ബേസിൽ ജോസഫിന്റെ അഭിനയ മികവിനെ കുറിച്ച് തമിഴ് താരം ജ്യോതിക തന്നോട് സംസാരിച്ചിരുന്നുവെന്ന് വെളിപ്പെടുത്തി നടൻ പൃഥ്വിരാജ്. ജയ ജയ ജയ ജയഹേ സിനിമ കണ്ട ശേഷമാണ് ബേസിലിന്റെ പെർഫോമൻസിനെ പുകഴ്ത്തി ജ്യോതിക സംസാരിച്ചതെന്നാണ് പൃഥ്വിരാജ് വ്യക്തമാക്കുന്നത്. ഒരു സ്വകാര്യ മാദ്ധ്യമത്തോട് സംസാരിക്കുകയായിരുന്നു അദ്ദേഹം.
ഒരിക്കൽ താൻ മുംബൈയിലുള്ള ജ്യോതികയുടെയും സൂര്യയുടെയും വീട്ടിൽ ഭക്ഷണം കഴിക്കാൻ പോയിരുന്നു. ആ സമയത്താണ് ബേസിലിനെ കുറിച്ചും ജയ ജയ ജയഹേ സിനിമയെ കുറിച്ചും ജ്യോതിക സംസാരിച്ചത്. സിനിമയിലെ ബേസിലിന്റെ പെർഫോമൻസ് കണ്ട് അവനെ തല്ലാൻ തോന്നിയെന്നും എന്നാൽ ബേസിൽ ആയതുകൊണ്ട് സ്നേഹിക്കാനും തോന്നുമെന്നാണ് ജ്യോതിക പറഞ്ഞതെന്ന് പൃഥ്വിരാജ് പറഞ്ഞു.
ബേസിലിന്റെ റിയൽ ലൈഫ് പേഴ്സണാലിറ്റിയെക്കുറിച്ച് താൻ കേട്ട ഏറ്റവും നല്ല റിമാർക്ക് ജ്യോതികയിൽ നിന്നാണ്. താൻ മുംബൈയിലുള്ള അവരുടെ വീട്ടിൽ ഭക്ഷണം കഴിക്കാൻ പോയതായിരുന്നു. താൻ അവിടെ പോവുന്നതിന്റെ ഒന്നോ രണ്ടോ ദിവസം മുമ്പാണ് അവർ ജയ ജയ ജയഹേ കാണുന്നത്. ആ സമയത്താണ് സിനിമ ഒടിടി സ്ട്രീമിങ് ആരംഭിച്ചത്. ഭക്ഷണമൊക്കെ കഴിച്ച ശേഷം തങ്ങൾ ആ സിനിമയെക്കുറിച്ച് സംസാരിച്ചു. എന്ത് ബ്രില്യന്റാണ് ആ സിനിമ എന്നൊക്കെ പറഞ്ഞ് ഒടുക്കം ബേസിലിലേക്ക് ചർച്ചയെത്തി. തനിക്ക് ആ സമയത്ത് ബേസിലുമായി അത്ര അടുപ്പമുണ്ടായിരുന്നില്ലെന്നും പൃഥ്വി വ്യക്തമാക്കുന്നു.
ജ്യോതിക തന്നോട് പറഞ്ഞത്, ബേസിലിന്റെ ആ ക്യാരക്ടറിനെ കാണുമ്പോൾ ഒരെണ്ണം പൊട്ടിക്കാനാണ് തോന്നിയത്. പക്ഷേ ഇവനായത് കൊണ്ട് സ്നേഹിക്കാനും തോന്നുന്നു എന്ന്. ആ ക്യാരക്ടർ അവൻ നന്നായി ചെയ്തുവെച്ചിട്ടുണ്ട്. പക്ഷേ എല്ലാവർക്കും ജ്യോതിക പറഞ്ഞതുപോലെയാണ് തോന്നുന്നതെന്ന് പൃഥ്വിരാജ് കൂട്ടിച്ചേർത്തു.