കണ്ണൂർ : പെരിയ ഇരട്ടക്കൊലക്കേസിലെ പ്രതികളെ സിബിഐ ചോദ്യം ചെയ്തു. റിമാന്റിൽ കഴിയുന്ന 11 പ്രതികളെയാണ് ചോദ്യം ചെയ്തത്. കണ്ണൂർ സെൻട്രൽ ജയിലിൽ എത്തിയായിരുന്നു ചോദ്യം ചെയ്യൽ.
കേസ് ഏറ്റെടുത്തതിന് പിന്നാലെ പ്രതികളെ ചോദ്യം ചെയ്യാൻ അന്വേഷണ സംഘത്തിന് കോടതി അനുമതി നൽകിയിരുന്നു. ഇതിന് പിന്നാലെയാണ് സിബിഐ ജയിലിൽ എത്തിയത്. മൂന്ന് ദിവസം മുൻപാണ് ചോദ്യം ചെയ്യൽ ആരംഭിച്ചത്.
കേസിലെ ആദ്യ മൂന്ന് പ്രതികളായ സിപിഎം ലോക്കൽ കമ്മിറ്റി അംഗം എ. പീതാംബരൻ, സിജെ സജി, കെ.എം സുരേഷ് എന്നിവരെ ചൊവ്വാഴ്ചയും, 4 മുതൽ 11 വരെയുള്ള പ്രതികളെ ഇന്നലെയും ചോദ്യം ചെയ്തു. പരസ്പര വിരുദ്ധമായാണ് പ്രതികൾ മൊഴി നൽകിയത് എന്നാണ് വിവരം.
തുടർന്ന് വ്യാഴാഴ്ച മുഴുവൻ പ്രതികളെയും വീണ്ടും ചോദ്യം ചെയ്തു. ക്രൈംബ്രാഞ്ചിന്റെ കണ്ടെത്തൽ, കുറ്റപത്രത്തിലെ വിവരങ്ങൾ, സിബിഐയുടെ കണ്ടെത്തൽ എന്നിവയുടെ അടിസ്ഥാനത്തിലായിരുന്നു ചോദ്യം ചെയ്യൽ