ബെയ്ജിംഗ്: അമേരിക്കൻ പ്രസിഡന്റ് ജോ ബൈഡനും ചൈനീസ് പ്രസിഡന്റ് ഷി ജിൻപിംഗുമായി ചർച്ച നടത്തി. യുക്രൈൻ – റഷ്യ യുദ്ധത്തിന്റെ സ്ഥിതിഗതികൾ വിലയിരുത്താൻ വേണ്ടിയാണ് ഇരുവരും തമ്മിൽ ചർച്ച നടത്തിയത്. വീഡിയോ കോൺഫറൻസിലൂടെയായിരുന്നു ചർച്ച. രണ്ടുമണിക്കൂർ നേരം ഇരുവരും തമ്മിൽ സംസാരിച്ചു. സമാധാനത്തിനായി ചൈനയും യുഎസും അന്താരാഷ്ട്ര ഉത്തരവാദിത്വം ഏറ്റെടുക്കണമെന്ന് ചൈനീസ് പ്രസിഡന്റ് ഷി പ്രസിഡന്റ് ബൈഡനോട് ആവശ്യപ്പെട്ടു.
ഇപ്പോഴത്തെ യുദ്ധത്തോട് ആർക്കും താത്പര്യമില്ലെന്ന് ഷി ജിൻപിംഗ് വ്യക്തമാക്കിയതായാണ് ചൈനീസ് മാദ്ധ്യമങ്ങൾ റിപ്പോർട്ട് ചെയ്യുന്നത്. ചരിത്രത്തിന്റെ ശരിയായ ഭാഗത്ത് ചൈന നിൽക്കേണ്ടതുണ്ട്. അത് ആവശ്യമാണ്. ഇപ്പോൾ യുക്രൈനിൽ നടക്കുന്ന സംഭവവികാസങ്ങൾ ആരും ആഗ്രഹിക്കുന്നില്ല. സമാധാനവും സുരക്ഷയുമാണ് രാജ്യാന്തര സമൂഹത്തിന്റെ ഏറ്റവും മൂല്യവത്തായ നിധികളെന്നും ചൈനയും യുഎസും രാജ്യാന്തര ഉത്തരവാദിത്തങ്ങൾ ഏറ്റെടുക്കണമെന്നും അദ്ദേഹം അറിയിച്ചതായും റിപ്പോർട്ടുകളുണ്ട്.
അതേസമയം യുക്രൈൻ ആക്രമണം അവസാനിപ്പിക്കാൻ ഇരു നേതാക്കളും റഷ്യയോട് ആവശ്യപ്പെട്ടതായി വൈറ്റ് ഹൗസ് വ്യക്തമാക്കി.