തിരുവനന്തപുരം: സംസ്ഥാനത്തെ സ്കൂളുകള് നാളെ തുറക്കുമെന്നും ഫെബ്രുവരി 21 മുതല് എല്ലാ ക്ലാസുകളും രാവിലെ മുതല് വൈകിട്ട് വരെയായിരിക്കുമെന്നും വിദ്യാഭ്യാസ മന്ത്രി വി ശിവന്കുട്ടി അറിയിച്ചു. എന്നാല്, ഒന്നു മുതല് ഒന്പതു വരെയുള്ള ക്ലാസുകള് ഉച്ചവരെ മാത്രമായിരിക്കുമെന്നും മന്ത്രി പറഞ്ഞു.
അതേസമയം, 10,11,12 ക്ലാസുകള് നിലവിലുള്ളത് പോലെ ഫെബ്രുവരി 19വരെ തുടരും. ഫെബ്രുവരി 21 മുതല് ഒന്നുമുതല് പന്ത്രണ്ടുവരെയുള്ള ക്ലാസുകള് സാധാരണപോലെ നടക്കും. ഈ മാസവും അടുത്ത മാസവും പൊതു അവധിയൊഴികെയുള്ള എല്ലാ ശനിയാഴ്ചയും പ്രവൃത്തി ദിവസമായിരിക്കും. പ്രീപ്രൈമറി ക്ലാസുകള് നാളെ ആരംഭിക്കും. ഉച്ചവരെ മാത്രമായിരിക്കും ക്ലാസ്. എന്നാല്, പകുതി കുട്ടികള്ക്ക് മാത്രമാണ് അനുമതി. ഉച്ചയ്ക്ക് ശേഷമായിരിക്കും വിക്ടേഴ്സിലെ ക്ലാസുകളെന്നും മന്ത്രി കൂട്ടിച്ചേര്ത്തു.
ഒന്നു മുതല് ഒന്പതുവരെയുള്ള ക്ലാസുകള്ക്ക് വാര്ഷിക പരീക്ഷ നടത്തും. എസ് എസ് എല് സി, പ്ലസ് ടു മോഡല് പരീക്ഷകള് മാര്ച്ച് 16ന് ആരംഭിക്കും. എസ്എസ്എല്സി-പ്ലസ് ടു ക്ലാസുകളിലെ പൂര്ത്തിയാക്കിയ പാഠഭാഗത്തെ കുറിച്ച് അധ്യാപകര് റിപ്പോര്ട്ട് നല്കാനും മന്ത്രി നിര്ദ്ദേശിച്ചു.