ന്യൂഡല്ഹി: ഭരണഘടന സംരക്ഷിക്കാനാണ് സിപിഐ വിട്ട് കോണ്ഗ്രസില് ചേര്ന്നതെന്ന് കനയ്യ കുമാര്. സിപിഐയില് ചേര്ന്ന് അഞ്ച് വര്ഷത്തിന് ശേഷം പാര്ട്ടി വിട്ടെങ്കിലും സിപിഐയോട് വിരോധമില്ലെന്നും, ആരെയും ആക്ഷേപിക്കാനില്ലെന്നും കനയ്യ കുമാര് വ്യക്തമാക്കി.
തന്റെ ജനനവും വളര്ച്ചയും സിപിഐയില് തന്നയായിരുന്നു. ഇപ്പോള് ഇക്കാണുന്ന യോഗ്യതകളെല്ലാം സിപിഐ തന്നതാണ്, നിലവിലെ സാഹചര്യത്തില് ഐക്യപ്രതിപക്ഷമാണ് രാജ്യത്തിന് ആവശ്യം. അതിന് വേണ്ടിയാണ് കോണ്ഗ്രസിനോടൊപ്പം ചേര്ന്ന് പ്രവര്ത്തിക്കാനുള്ള തീരുമാനമെടുത്തതെന്നും അദ്ദേഹം പ്രതികരിച്ചു.
കഴിഞ്ഞ ദിവസമാണ് സിപിഐയുടെ യുവ നേതാവ് കനയ്യ കുമാര് കോണ്ഗ്രസില് ചേര്ന്നത്. ദളിത് നേതാവ് ജിഗ്നേഷ് മേവാനി എംഎല്എയും കോണ്ഗ്രസില് ചേര്ന്നെങ്കിലും ഔദ്യോഗിക പ്രവേശം അറിയിച്ചിട്ടില്ല.
രാഹുല്ഗാന്ധിക്കൊപ്പം ഷഹീദ് പാര്ക്കിലെ ഭഗത് സിംഗ് പ്രതിമയില് പുഷ്പാര്ച്ചന നടത്തിയാണ് കനയ്യ കുമാറും ജിഗ്നേഷ് മേവാനിയും കോണ്ഗ്രസില് അണി ചേര്ന്നത്.