മലപ്പുറം: ദുബായ് എക്സ്പോ 2020 ൽ വൻ പ്രവാസി സാന്നിദ്ധ്യമാകാൻ യു.എ.ഇ നാഷണൽ കെ.എം.സി.സി.യും. എക്സ്പോ അധികൃതരുമായും, ഇന്ത്യൻ കോൺസുലറ്റുമായും കെ.എം.സി.സി ഇതുസംബന്ധിച്ച് ചർച്ചകൾ നടത്തി. കെ.എം.സി.സി. പ്രസിഡന്റ് പുത്തൂർ റഹ്മാനാണ് ഇക്കാര്യം അറിയിച്ചത്.
നവംബർ 5 ന് രാത്രി എട്ടു മണി മുതൽ പത്തു മണിവരെ ഇന്ത്യൻ പവലിയനിലെ ആംഫി തിയേറ്ററിൽ കെ.എം.സി.സിയുടെ നേതൃത്വത്തിൽ കേരളത്തിന്റെ തനത് ആയോധന കലകളായ വാൾപയറ്റ്, ഉറുമി, ചുരിക തുടങ്ങിയവയുടെ കലാപ്രകടനവും അവതരിപ്പിക്കും. ഡിസംബർ 3 ന് വൈകുന്നേരം ആറു മണി മുതൽ രാത്രി 9 ണിവരെ കേരളീയം എന്ന പേരിൽ കേരളത്തിന്റെ ജനപ്രിയ നാട്യ കലാരൂപങ്ങൾ ആയ മോഹിനിയാട്ടം, കഥകളി, കോൽക്കളി, മാർഗംകളി, തിരുവാതിര, അറവന, ഒപ്പന തുടങ്ങിയവ ഇൻഡോർ ഓഡിറ്റോറിയത്തിൽ അരങ്ങേറുമെന്നും കെ.എം.സി.സി അറിയിച്ചു.
മാർച്ച് 11 ന്, രാത്രി ഏഴു മുതൽ പത്തുവരെ എക്സ്പോയിലെ ഏറ്റവും വലിയ വേദിയായ ദുബൈ മില്ലേനിയം ആംഫി തിയേറ്ററിൽ ഇൻഡോ-അറബ് സംസ്ക്കാരങ്ങളുടെ സമന്വയ പ്രതീകമായി ‘ സലാം ദുബായ്’ എന്ന പേരിൽ കലാപരിപാടികൾ അവതരിപ്പിക്കപ്പെടും. ദുബായ് സർക്കാരിന്റെ കോവിഡ് കാല ആരോഗ്യ പ്രവർത്തങ്ങൾക്കുള്ള ഇന്ത്യൻ പ്രവാസി സമൂഹത്തിന്റെ ഒരു നന്ദി രേഖപ്പെടുത്തലായി ഇത് മാറു മെന്നും ഇന്ത്യയിലെയും, യു.എ.ഇയിലേയും പ്രമുഖ കലാകാരന്മാർ ഈ ചടങ്ങിൽ പങ്കെടുക്കും.
യു.എ.ഇയിൽ ഏറ്റവുമധികം അംഗങ്ങളുള്ള സാമൂഹിക പ്രസ്ഥാനം എന്ന നിലയിൽ കെ.എം.സി.സിക്കു ലഭിച്ച ഈ അവസരം യു.എ.ഇ യിലെ ഇന്ത്യൻ പ്രവാസികൾക്ക് കൂടിയുള്ള അംഗീകാരമാണെന്ന് ഭാരവാഹികൾ പറഞ്ഞു. ഇന്ത്യൻ പവലിയനുകൾ ഒരുക്കുന്ന വിസ്മയലോകങ്ങൾക്കു പുറമേയാണ് കേരളത്തിന്റെ കലയും സംസ്കൃതിയും പ്രദർശിപ്പിക്കുന്ന പ്രകടനങ്ങൾ കെ.എം.സി.സി. ഒരുക്കുന്നത്. ലോകത്തെ ഏറ്റവും വലിയ സാംസ്കാരിക പരിപാടിയായ എക്സ്പോ 2020 ദുബായിക്ക് പുത്തനുണർവേകുമെന്നും കെ.എം.സി.സിക്കും ഈ നവലോക സൃഷ്ടിമേളയിൽ ഇന്ത്യക്കാരായ 200ൽ പരം കല -കായിക പ്രതിഭകളെ അണിനിരത്തി വൻ മുന്നേറ്റത്തിന്റെ ഭാഗമാവാൻ അവസരം നൽകിയതിൽ നന്ദി ഉണ്ടെന്നും യു.എ.ഇ, കെ.എം.സി.സി ജനറൽ സെക്രട്ടറി പി. കെ. അൻവർ നഹ വ്യക്തമാക്കി.