ഡൊറാഡൂൺ: നിയമസഭാ തെരഞ്ഞെടുപ്പിന് മുന്നോടിയായി ഉത്തരാഖണ്ഡിൽ വലിയ വാഗ്ദാനങ്ങൾ നൽകി ഡൽഹി മുഖ്യമന്ത്രി അരവിന്ദ് കെജ്രിവാൾ. ഉത്തരാഖണ്ഡിൽ അധികാരത്തിലേറിയാൽ 6 മാസത്തിനകം ഒരു ലക്ഷം തൊഴിൽ അവസരങ്ങൾ നൽകുമെന്നാണ് അരവിന്ദ് കെജ്‌രിവാളിന്റെ വാഗ്ദാനം. 5000 രൂപ പ്രതിമാസ അലവൻസ്, തൊഴിൽ മേഖലയിൽ 80 ശതമാനം സംവരണം തുടങ്ങി വൻ പ്രഖ്യാപനങ്ങളും അദ്ദേഹം നടത്തിയിട്ടുണ്ട്. ഹൽദ്വാനിയിലെ യോഗത്തിൽ സംസാരിക്കവെയാണ് അദ്ദേഹം ഇക്കാര്യം അറിയിച്ചത്.
ഉത്തരാഖണ്ഡിലെ യുവാക്കൾക്ക് ഇവിടെത്തന്നെ ജോലി ലഭ്യമാക്കും. സംസ്ഥാനത്ത് മികച്ച ലക്ഷ്യങ്ങളുള്ള സർക്കാർ വന്നാൽ ഇതെല്ലാം സാധ്യമാണ്. തൊഴിലില്ലായ്മ മൂലമാണു സംസ്ഥാനത്തെ യുവാക്കൾ മറ്റിടങ്ങളിലേക്കു കുടിയേറുന്നതെന്നും അദ്ദേഹം പറഞ്ഞു. മൂന്നാം തവണയാണ് അരവിന്ദ് കെജ്രിവാൾ ഉത്തരാഖണ്ഡിൽ സന്ദർശനം നടത്തുന്നത്. എല്ലാ കുടുംബങ്ങൾക്കും 300 യൂണിറ്റ് വൈദ്യുതി സൗജന്യമായി നൽകുമെന്നു നേരത്തെ കെജ്രിവാൾ വാഗ്ദാനം ചെയ്തിരുന്നു.