കൊച്ചി: മുൻ എംഎൽഎയ്ക്ക് സഹായ ഹസ്തവുമായി നടൻ മമ്മൂട്ടി. സിപിഐ നേതാവും ഹൊസ്ദുർഗ് മുൻ എംഎൽഎയുമായ എം.നാരായണനാണ് മമ്മൂട്ടി സഹായം ഉറപ്പു നൽകിയിരിക്കുന്നത്. ഹൃദയശസ്ത്രക്രിയയ്ക്ക് ആവശ്യമായ പണം നൽകുമെന്നാണ് മമ്മൂട്ടി അറിയിച്ചിരിക്കുന്നത്. എം നാരായണന് അഞ്ചു ലക്ഷം രൂപ ഹൃദയശസ്ത്രക്രിയയ്ക്കായി ആശുപത്രിയിൽ കെട്ടിവയ്ക്കണമെന്നുള്ള മാദ്ധ്യമ വാർത്തകൾ ശ്രദ്ധയിൽപ്പെട്ടതോടെയാണ് അദ്ദേഹം സഹായം വാഗ്ദാനം ചെയ്തിരിക്കുന്നത്.
തിരുവനന്തപുരം നിംസിൽ ശസ്ത്രക്രിയയ്ക്കുള്ള ഒരുക്കങ്ങളെല്ലാം മമ്മൂട്ടി ചെയ്യുകയും അത് നാരായണനെ അറിയിക്കുകയും ചെയ്തു. മമ്മൂട്ടിയുടെ ഓഫിസിൽ നിന്ന് വിളിച്ചിരുന്നുവെന്നും ശസ്ത്രക്രിയയ്ക്ക് വേണ്ട എല്ലാ ഏർപ്പാടുകളും മമ്മൂട്ടി നേരിട്ട് ചെയ്തിട്ടുണ്ടെന്നും നാരായണൻ മാദ്ധ്യമങ്ങളോട് പറഞ്ഞു. തന്നെ പോലെ ഒരാളെ സഹായിക്കാനുള്ള മനസ് കാണിച്ചതിന് അദ്ദേഹത്തിന് നന്ദി അറിയിക്കുന്നുവെന്നും നാരായണൻ വ്യക്തമാക്കി. മമ്മൂട്ടിയെ നേരിൽ കാണാൻ ആഗ്രഹമുണ്ടെന്നും എന്നാൽ തനിക്ക് ഇപ്പോൾ യാത്ര ചെയ്യാൻ കഴിയില്ലെന്നും അദ്ദേഹം പറയുന്നു. നേരിട്ടു വിളിക്കാമെന്നു മമ്മൂട്ടി ഉറപ്പു നൽകിയതായും നാരായണൻ കൂട്ടിച്ചേർത്തു.
പെൻഷനായി ലഭിക്കുന്ന ചെറിയ തുകകൊണ്ടാണ് നാരായണൻ ഉപജീവനം നടത്തിയിരിുന്നത്. ബുദ്ധിമുട്ട് നിറഞ്ഞ ജീവിതത്തിലേക്ക് രോഗം കൂടി എത്തിയതോടെ അദ്ദേഹത്തിന്റെ അവസ്ഥ ഏറെ പരുങ്ങലിലായി. ചികിത്സയ്ക്ക് പണമില്ലാത്ത അവസ്ഥയിലേക്ക് എത്തിയപ്പോഴാണ് അദ്ദേഹത്തിന്റെ ബുദ്ധിമുട്ടുകളെ കുറിച്ച് മാദ്ധ്യമങ്ങൾ റിപ്പോർട്ട് ചെയ്യുന്നത്. ഇത് ശ്രദ്ധയിൽപ്പെട്ടതോടൊയാണ് മമ്മൂട്ടി അദ്ദേഹത്തിന് സഹായം വാഗ്ദാനവുമായി രംഗത്തെത്തിയത്.