പ്രഭാസിന്റെ ‘ആദിപുരുഷ്’ ജൂണ് 16-ന് തിയറ്ററുകളിലെത്തുകയാണ്. വലിയ ബുക്കിംഗ് ആണ് സിനിമയ്ക്ക് ലഭിക്കുന്നത്. ഇപ്പോഴിതാ, നിര്ധനരായ കുട്ടികള്ക്കായി 10,000 ടിക്കറ്റുകള് വാങ്ങുമെന്നറിയിച്ചിരിക്കുകയാണ് നടന് രാം ചരണ്. നേരത്തെ രണ്ബീര് കപൂറും ആദിപുരുഷിന്റെ 10,000 ടിക്കറ്റുകള് വാങ്ങിയിരുന്നു.
തെലങ്കാനയിലെ സര്ക്കാര് സ്കൂളുകള്ക്കും അനാഥാലയങ്ങള്ക്കും വൃദ്ധസദനങ്ങള്ക്കുമായി ആദിപുരുഷിന്റെ 10,000 ടിക്കറ്റുകള് സംഭാവന ചെയ്യുമെന്ന് കശ്മീര് ഫയല്സിന്റെ നിര്മ്മാതാവായ അഭിഷേക് അഗര്വാളും വ്യക്തമാക്കിയിരുന്നു. രാമായണത്തെ അടിസ്ഥാനമാക്കി ഒരുക്കുന്ന ചിത്രത്തില് രാമനായി പ്രഭാസും സീതയായി കൃതി സനോണും വേഷമിടുന്നു. ഓം റൗത്ത് ആണ് ചിത്രം സംവിധാനം ചെയ്യുന്നത്.
രാവണനായി വേഷമിടുന്നത് ബോളിവുഡ് താരം സെയ്ഫ് അലിഖാനാണ്. നടന് സണ്ണി സിംഗും പ്രധാന വേഷത്തിലെത്തുന്നുണ്ട്. ഹനുമാന് ആയി ദേവദത്ത നാഗേയും അഭിനയിക്കുന്നു. സിനിമയുടെ ബജറ്റ് 500 കോടിയാണ്. ഹിന്ദി, തമിഴ്, തെലുങ്ക്, കന്നഡ, മലയാളം തുടങ്ങിയ ഭാഷകളില് സിനിമ റിലീസ് ചെയ്യും.