ഏറെ വിവാദങ്ങള്ക്കൊടുവില് തിയേറ്ററുകളിലെത്തിയ ഷാരൂഖ് ഖാന് ചിത്രം പഠാന് വന് വിജയമാണ് നേടിയത്. ഇപ്പോഴിതാ ആയിരം കോടി ക്ലബ്ബില് ഇടം പിടിച്ചിരിക്കുകയാണ് ചിത്രം. 250 കോടി ചിലവില് ഒരുക്കിയ ചിത്രം. റിലീസ് ചെയ്ത 27 ദിവസം കൊണ്ടാണ് ചരിത്ര നേട്ടം കൈവരിച്ചത്.
ജനുവരി 25 ന് ലോകമെമ്ബാടും റിലീസിനെത്തിയ ചിത്രം ഇന്ത്യയില് നിന്ന് മാത്രം 620 കോടിയാണ് നേടിയത്. രാജ്യത്തിന് പുറത്ത് നിന്നും 380 കോടിയും. റിലീസ് ചെയ്ത ആദ്യ ദിവസം തന്നെ 100 കോടി ക്ലബ്ബില് ഇടം നേടിയ ചിത്രം ബോളിവുഡിന്റെ ചരിത്രം തന്നെ മാറ്റിക്കുറിക്കുന്ന ഒന്നായിരുന്നു.
ഹിന്ദി കൂടാതെ തെന്നിന്ത്യന് ഭാഷകളിലും പഠാന് റിലീസിനെത്തിയിരുന്നു. റിലീസിന് മുമ്ബേ തന്നെ വിവാദങ്ങളില് കുടുങ്ങിയ ചിത്രമായിരുന്നു പഠാന്. ഗാനരംഗത്ത് ദീപിക പദുക്കോണ് കാവിനിറത്തിലുള്ള ബിക്കിനി ധരിച്ചതിനെ തുടര്ന്നാണ് വിവാദങ്ങള് പൊട്ടിപ്പുറപ്പെട്ടത്. തുടര്ന്ന് സിനിമ ബഹിഷ്കരിക്കണമെന്നാവശ്യപ്പെട്ട് ബി.ജെ.പിയടക്കമുള്ള നിരവധി സംഘടനകള് രംഗത്തെത്തിയിരുന്നു. സിനിമ റിലീസ് ചെയ്ത ജനുവരി 25 നും വിവിധ ഭാഗങ്ങളില് ചില സിനിമാ തിയേറ്ററുകള് നശിപ്പിച്ചിരുന്നു.