ജയസൂര്യയെ നായകനാക്കി നാദിര്‍ ഷാ സംവിധാനം ചെയ്യുന്ന ‘ഈശോ’ ചിത്രത്തിന്റെ സെന്‍സറിംഗ് നടപടികള്‍ പൂര്‍ത്തിയായി. ചിത്രത്തിന് യു സര്‍ട്ടിഫിക്കറ്റ് ആണ് ലഭിച്ചിരിക്കുന്നത്. ‘ഒടുവില്‍ സെന്‍സര്‍ ബോര്‍ഡും പറയുന്നു, ഇത് ഒരു കട്ടും, മ്യൂട്ടും ഇല്ലാതെ കുടുംബസമേതം കാണേണ്ടതായുള്ള ക്‌ളീന്‍ യു ചിത്രമെന്ന്’ നാദിര്‍ഷ ഫേസ്ബുക്കില്‍ കുറിച്ചു.
നാദിര്‍ഷയുടെ സംവിധാനത്തിലൊരുങ്ങുന്ന ‘ഈശോ’, ‘കേശു ഈ വീടിന്റെ നാഥന്‍’ എന്നീ ചിത്രങ്ങള്‍ക്ക് അനുമതി നല്‍കരുതെന്നാവശ്യപ്പെട്ട് കത്തോലിക്കാ കോണ്‍ഗ്രസും വിഷയത്തില്‍ പരോക്ഷ വിമര്‍ശനവുമായി കെ.സി.ബി.സിയും നേരത്തെ രംഗത്തെത്തിയിരുന്നു. സിനിമയുടെ പേര് മതവികാരം വ്രണപ്പെടുത്തുന്നതാണെന്നും അതിനാല്‍ പ്രദര്‍ശനത്തിന് അനുമതി നല്‍കരുതെന്നും ആവശ്യപ്പെട്ട് ക്രിസ്ത്യന്‍ അസോസിയേഷന്‍ ഫോര്‍ സോഷ്യല്‍ ആക്ഷന്‍ എന്ന സംഘടന ഹൈക്കോടതിയില്‍ പൊതുതാത്പര്യ ഹര്‍ജിയും നല്‍കിയിരുന്നു.
എന്നാല്‍, ഹൈക്കോടതി ഹര്‍ജി തള്ളുകയും, സിനിമക്ക് ദൈവത്തിന്റെ പേരിട്ടു എന്നതുകൊണ്ട്് ഇടപെടാനാകില്ലെന്നും വ്യക്തമാക്കി. നാദിര്‍ഷ സംവിധാനം ചെയ്യുന്ന ചിത്രം ഒരു ത്രില്ലറാണ്. സുനീഷ് വാരനാടാണ് ചിത്രത്തിനായി തിരക്കഥ ഒരുക്കുന്നത്. അരുണ്‍ നാരായണന്‍ പ്രൊഡക്ഷന്‍സിന്റെ ബാനറില്‍ അരുണ്‍ നാരായണനാണ് ചിത്രം നിര്‍മ്മിച്ചിരിക്കുന്നത്.