ഇസ്ലാമാബാദ്: സുരക്ഷാ പ്രശ്നങ്ങള് ചൂണ്ടിക്കാട്ടി പാക് പര്യടനത്തില് നിന്നും ന്യൂസിലാന്റ് ക്രിക്കറ്റ് ടീം പിന്മാറാനുള്ള കാരണം ഇന്ത്യയാണെന്ന ആരോപണവുമായി പാകിസ്ഥാന്.
ന്യൂസിലാന്റ് ടീമിന് ഭീഷണി മുഴക്കി ലഭിച്ച ഇ-മെയില് ഇന്ത്യയില് നിന്നാണ് വന്നത് എന്നാണ് ബുധനാഴ്ച പാക് ആഭ്യന്തര മന്ത്രി ഷേക്ക് റഷീദ് അഹമ്മദിന്റെ സാന്നിധ്യത്തില് പാക് പബ്ലിക്ക് റിലേഷന് മന്ത്രി ഫവാദ് ചൗദരി ആരോപിച്ചത്.
അതേ സമയം പാകിസ്ഥാന് വാദം ‘അടിസ്ഥാനമില്ലാത്ത പ്രചാരണങ്ങളാണ്’ എന്ന് ഇന്ത്യ പ്രതികരിച്ചു. ‘ഇന്ത്യയ്ക്കെതിരെ അടിസ്ഥാനമില്ലാത്ത ആരോപണം ഉന്നയിക്കുന്നത് പാകിസ്ഥാന്റെ പുതിയ രീതിയല്ല. ഇത്തരം ആരോപണം ഉന്നയിക്കുന്ന സമയത്ത് പാകിസ്ഥാന് സ്വന്തം നാട്ടില് തീവ്രവാദ ശക്തികള്ക്ക് താവളം ഒരുക്കുന്നത് തടയാനും, സ്വന്തം നാട്ടിലെ സ്ഥിതി നല്ല രീതിയിലാക്കാനും ശ്രമിക്കണമെന്ന് ഇന്ത്യന് വിദേശകാര്യ വക്താവ് അരീന്ദം ബാഗ്ജി പ്രതികരിച്ചു.
18 വര്ഷത്തിന് ശേഷം പാകിസ്ഥാനില് കളിക്കാന് എത്തിയ ന്യൂസിലാന്റ് വെള്ളിയാഴ്ചയാണ് തങ്ങളുടെ സന്ദര്ശനം റദ്ദാക്കിയത്. ഇതിന് പിന്നാലെ പ്രഖ്യാപിച്ച പാക് പമ്പരയില് നിന്നും ഇംഗ്ലീഷ് ക്രിക്കറ്റ് ബോര്ഡും പിന്മാറി. അടുത്ത മാസമായിരുന്നു പാകിസ്ഥാന് വേദിയായി ഇംഗ്ലണ്ട് പാകിസ്ഥാന് മത്സരങ്ങള് നടക്കേണ്ടിയിരുന്നത്.