വാഷിങ്ടൺ: അമേരിക്കൻ പ്രസിഡന്റ് ഡോണൾഡ് ട്രംപിന് വീണ്ടും നിയമപരമായ തിരിച്ചടി. ജന്മാവകാശ പൗരത്വം റദ്ദാക്കാനുള്ള അദ്ദേഹത്തിന്റെ എക്സിക്യൂട്ടീവ് ഉത്തരവ് ഫെഡറൽ അപ്പീൽ കോടതി തള്ളി. ഇത് ഭരണഘടനാ വിരുദ്ധമാണെന്ന് ഒമ്പതാം സെർക്യൂട്ട് അപ്പീൽസ് കോടതിയുടെ മൂന്നംഗ ബെഞ്ച് നിരീക്ഷിച്ചു. നേരത്തെ കീഴ്കോടതി തള്ളിയ ഉത്തരവിനെ ചോദ്യം ചെയ്താണ് വൈറ്റ് ഹൗസ് അപ്പീൽ കോടതിയെ സമീപിച്ചത്.
യുഎസിൽ താത്കാലിക ജോലിയിലോ ടൂറിസ്റ്റ് വിസയിലോ താമസിക്കുന്നവരുടെ കുട്ടികൾക്ക് ഇനി സ്വയമേവ പൗരത്വം ലഭിക്കരുതെന്നായിരുന്നു ഉത്തരവിന്റെ ഉദ്ദേശ്യം. നിലവിലുള്ള നിയമപ്രകാരം, അമേരിക്കൻ ഭൂപ്രദേശത്ത് ജനിക്കുന്നവർക്ക് സ്വാഭാവികമായി പൗരത്വം ലഭിക്കും. ട്രംപിന്റെ കുടിയേറ്റ വിരുദ്ധ നയത്തിന്റെ ഭാഗമായിട്ടാണ് ജന്മാവകാശ പൗരത്വം നിർത്തലാക്കാനുള്ള നീക്കം.
അമേരിക്കൻ പ്രസിഡന്റായി അധികാരമേൽക്കുമ്പോൾ തന്നെ ഇത് നടപ്പിലാക്കുമെന്ന പ്രഖ്യാപനം ട്രംപ് നടത്തുകയും അതിന്റെ അടിസ്ഥാനത്തിൽ എക്സിക്യൂട്ടീവ് ഉത്തരവ് പുറപ്പെടുവിക്കുകയും ചെയ്തിരുന്നു. ഉത്തരവ് നടപ്പാകുമെങ്കിൽ, നിയമാനുസൃതമായി സ്ഥിരതാമസ അനുമതി ലഭിച്ചവരുടെയും അമേരിക്കൻ പൗരന്മാരുടെയും മക്കൾക്ക് മാത്രമേ പൗരത്വം ലഭിക്കുമായിരുന്നുള്ളൂ.
അമേരിക്കൻ പ്രസിഡന്റായി വീണ്ടും തിരഞ്ഞെടുക്കപ്പെട്ടാൽ ജന്മാവകാശ പൗരത്വം ഇല്ലാതാക്കുമെന്ന് ട്രംപ് പ്രഖ്യാപിച്ചിരുന്നുവെങ്കിലും, അതിനുള്ള നിയമപരമായ അതിക്രമം ഇതോടെ തടയപ്പെട്ടതായി വിലയിരുത്തപ്പെടുന്നു. വിധി ചോദ്യം ചെയ്യാൻ ട്രംപ് ഭരണകൂടം ഇനി സുപ്രീം കോടതിയെ സമീപിക്കുമെന്നാണു സൂചന.