ദില്ലി: ദില്ലി മുഖ്യമന്ത്രിയെ തീരുമാനിക്കുന്നതിനെക്കുറിച്ച് ബിജെപിയിൽ ചർച്ചകൾ തുടരുന്നു. സംസ്ഥാന ഘടകത്തിലെ മുതിർന്ന നേതാക്കളുമായി ദേശീയ നേതൃത്വം ഇന്നും കൂടിക്കാഴ്ച നടത്തും. ന്യൂ ദില്ലി മണ്ഡലത്തിൽ അരവിന്ദ് കെജ്രിവാളിനെ തോൽപ്പിച്ച പർവേഷ് വെർമ, മുൻ പ്രതിപക്ഷ നേതാവ് വിജേന്ദർ ഗുപ്ത, വനിതാ നേതാവ് ശിഖ റായ് എന്നിവരുടെ പേരുകൾ പരിഗണനയിലുണ്ട്. അന്തിമ തീരുമാനം ദേശീയ നേതൃത്വത്തിന്റേതായിരിക്കുമെന്നും പ്രധാനമന്ത്രി നരേന്ദ്രമോദി വിദേശ സന്ദർശനത്തിന് പുറപ്പെടുന്നതിന് മുൻപ് തീരുമാനമുണ്ടാകുമെന്നും റിപ്പോർട്ടുകളുണ്ട്.
പ്രധാനമന്ത്രി നരേന്ദ്ര മോദി, ആഭ്യന്തര മന്ത്രി അമിത് ഷാ, പാർട്ടി അധ്യക്ഷൻ ജെപി നദ്ദ എന്നിവരടങ്ങുന്ന നേതൃത്വയോഗം മുഖ്യമന്ത്രി സ്ഥാനാർഥിയെ നിശ്ചയിക്കാൻ ചർച്ചകൾ നടത്തി. പർവേഷ് വെർമ മാത്രമല്ല മറ്റ് പേരുകളും പരിഗണനയിലുണ്ടെന്നതാണ് പാർട്ടി വൃത്തങ്ങളുടെ സൂചന. മോദിയുടെ വിദേശ യാത്രയ്ക്ക് ശേഷം സത്യപ്രതിജ്ഞ നടക്കുമെന്നാണ് പ്രതീക്ഷ.