ആലപ്പുഴ: ഇന്ത്യൻ വ്യോമസേനയിൽ അഗ്നിവീർവായു 2025 റിക്രൂട്ട്മെന്റിനായുള്ള ഓൺലൈൻ രജിസ്ട്രേഷൻ ജൂലൈ എട്ടിന് ആരംഭിക്കും. 2004 ജൂലൈ മൂന്നിനും 2008 ജനുവരി മൂന്നിനുമിടയിൽ ജനിച്ച അവിവാഹിതരായ പുരുഷ, സ്ത്രീ ഉദ്യോഗാർത്ഥികൾക്ക് അപേക്ഷിക്കാം. https://https://agnipathvayu.cdac.in സൈറ്റിലൂടെ ഓൺലൈനായി രജിസ്റ്റർ ചെയ്യാം. അവസാന തീയതി ജൂലൈ 28. ഓൺലൈൻ പരീക്ഷ ഒക്ടോബർ 18ന്.
വിദ്യാഭ്യാസ യോഗ്യത: 50 ശതമാനം മാർക്കോടെ പ്ലസ്ടു/തത്തുല്യം. അല്ലെങ്കിൽ 50 ശതമാനം മാർക്കോടെ മെക്കാനിക്കൽ/ഇലക്ട്രിക്കൽ/ഇലക്ട്രോണിക്‌സ്/ഓട്ടോമൊബൈൽ/കംപ്യൂട്ടർ സയൻസ്/ ഇൻസ്ട്രുമെന്റേഷൻ ടെക്‌നോളജി/ഇൻഫർമേഷൻ ടെക്‌നോളജി/ ഇൻഫോർമേഷൻ ടെക്‌നോളജിയിൽ ത്രിവത്സര ഡിപ്ലോമ.
അല്ലെങ്കിൽ ഫിസിക്‌സ്, മാത്തമാറ്റിക്‌സ് എന്നീ നോൺ വൊക്കേഷണൽ വിഷയങ്ങൾ ഉൾപ്പെട്ട വൊക്കേഷണൽ കോഴ്സ് 50 ശതമാനം മാർക്കോടെ പാസായിരിക്കണം.
അപേക്ഷകർ പ്ലസ്ടു/ഡിപ്ലോമ/ വൊക്കേഷണൽ കോഴ്‌സിന് ഇംഗ്ലീഷിൽ മാത്രമായി 50 ശതമാനം മാർക്ക് ഉണ്ടായിരിക്കണം. ഇംഗ്ലീഷ് ഉൾപ്പെടാത്ത ഡിപ്ലോമ/വൊക്കേഷണൽ കോഴ്സ് പഠിച്ചവർ പത്താം ക്ലാസിലോ പ്ലസ്ടുവിലോ ഇംഗ്ലീഷിന് 50 ശതമാനം മാർക്ക് നേടിയിരിക്കണം.