ന്യൂഡൽഹി: ജയിലിലേക്ക് മടങ്ങുന്നതിനെ കുറിച്ച് സംസാരിച്ച് ഡൽഹി മുഖ്യമന്ത്രിയും ആംആദ്മി നേതാവുമായ അരവിന്ദ് കെജ്രിവാൾ. ജൂൺ രണ്ടിന് വൈകീട്ട് മൂന്നു മണിയ്ക്ക് ജയിലിലേക്ക് മടങ്ങുമെന്നാണ് അദ്ദേഹം വ്യക്തമാക്കിയിട്ടുള്ളത്. എത്ര നാൾ ഇവർ ജയിലിൽ ഇടുമെന്ന് അറിയില്ല. ഇനി നിങ്ങൾക്കൊപ്പം ഉണ്ടാകില്ലെങ്കിലും മരുന്ന്, വൈദ്യുതി, ചികിത്സ തുടങ്ങിയവ നിങ്ങൾക്ക് ഉറപ്പാക്കുമെന്ന് അദ്ദേഹം വ്യക്തമാക്കി.
തന്റെ കുടുംബത്തിനു വേണ്ടി പ്രാർഥിക്കണം. ജീവൻ നഷ്ടമായാലും ഏകാധിപത്യത്തിന് എതിരായ പോരാട്ടം തുടരണം. ജയിലിൽ കിടന്ന 50 ദിവസം കൊണ്ട് തന്റെ ശരീരഭാരം 6 കിലോ കുറഞ്ഞു. തന്റെ മാതാപിതാക്കൾക്ക് നല്ല പ്രായമായി. തന്റെ അമ്മയ്ക്ക് വേണ്ടി നിങ്ങൾ ദിവസവും പ്രാർഥിച്ചാൽ അവർ ആരോഗ്യവതിയായി ഇരിക്കുമെന്ന് തനിക്ക് ഉറപ്പാണെന്നും കെജ്രിവാൾ ചൂണ്ടിക്കാട്ടി.
മാർച്ച് മാസമാണ് ഡൽഹി മദ്യനയ അഴിമതിയുമായി ബന്ധപ്പെട്ട കള്ളപ്പണം വെളുപ്പിക്കൽ കേസിൽ എൻഫോഴ്സ്മെന്റ് ഡയറക്ടറേറ്റ് അരവിന്ദ് കെജ്രിവാളിനെ അറസ്റ്റ് ചെയ്തത്. 50 ദിവസത്തെ ജയിൽ വാസത്തിന് ശേഷം 21 ദിവസത്തേയ്ക്ക് അദ്ദേഹത്തിന് സുപ്രീം കോടതി ഇടക്കാല ജാമ്യം അനുവദിക്കുകയായിരുന്നു.