തിരുവനന്തപുരം: മനുഷ്യാവകാശ കമ്മീഷൻ അധ്യക്ഷനായി ജസ്റ്റിസ് എസ് മണികുമാറിനെ നിയമിച്ചു. മനുഷ്യാവകാശ കമ്മീഷൻ അധ്യക്ഷ സ്ഥാനത്ത് കാലാവധി പൂർത്തിയാക്കിയ ജസ്റ്റിസ് ആന്റണി ഡൊമനിക്കിന് പകരമാണ് ജസ്റ്റിസ് മണികുമാറിന്റെ നിയമനം. സംസ്ഥാന സർക്കാരിന്റെ ശുപാർശയ്ക്ക് ഗവർണർ ആരിഫ് മുഹമ്മദ് ഖാൻ അംഗീകാരം നൽകി. എസ് മണികുമാർ.കേരള ഹൈക്കോടതി മുൻ ചീഫ് ജസ്റ്റിസായിരുന്നു.
വിരമിച്ച ഹൈക്കോടതി ചീഫ് ജസ്റ്റിസ്, സുപ്രീംകോടതി ജഡ്ജി എന്നിവരെയാണ് മനുഷ്യാവകാശ കമ്മീഷൻ ചെയർമാനായി നിയമിക്കുന്നത്. ഏപ്രിൽ 24 നാണ് കേരള ഹൈക്കോടതി ചീഫ് ജസ്റ്റിസ് എസ് മണികുമാർ വിരമിച്ചത്.
അതേസമയം, നിയമനത്തിനെതിരെ പ്രതിപക്ഷ നേതാവ് വിയോജനക്കുറിപ്പ് നൽകിയിരുന്നു. നേരത്തെ കേരള ഹൈക്കോടതിയില് നിന്ന് വിരമിച്ച ചീഫ് ജസ്റ്റിസ് മണികുമാറിന് സര്ക്കാര് വക യാത്രയയപ്പ് നൽകിയത് വലിയ വിവാദങ്ങൾക്കിടയാക്കിയിരുന്നു. മുഖ്യമന്ത്രിയും മന്ത്രിമാരും ഉള്പ്പെടെയുള്ളവരായിരുന്നു അന്ന് മണികുമാറിന് യാത്രയയപ്പ് നല്കിയത്.