അബുദാബി: ആഗോള അതിസമ്പന്ന പട്ടിക പുറത്തിറക്കി ഫോബ്സ് മാസിക. ലൂയിസ് വിറ്റൺ ഉടമ ബെർണാഡ് അർനാൾട്ട് (233 ബില്യൻ ഡോളർ) ആണ് പട്ടികയിൽ ഒന്നാം സ്ഥാനത്തുള്ളത്. ഇലോൺ മസ്ക് (195 ബില്യൻ ഡോളർ), ജെഫ് ബെസോസ് (194 ബില്യൻ ഡോളർ) തുടങ്ങിയവരാണ് രണ്ട്, മൂന്ന് സ്ഥാനങ്ങളിലുള്ളത്. ആഗോള ധനികരിൽ ഒമ്പതാം സ്ഥാനത്ത് ഇന്ത്യയുടെ മുകേഷ് അംബാനി ഇടംനേടി. 116 ബില്യൻ ഡോളർ ആസ്തിയാണ് അദ്ദേഹത്തിനുള്ളത്.
യുഎഇ ആസ്ഥാനമായുള്ള ലുലു ഗ്രൂപ്പിന്റെ ചെയർമാൻ എം എ യൂസഫലിയാണ് ധനികനായ മലയാളികളിൽ ഒന്നാമത്. പട്ടികയിൽ 12 മലയാളികൾ ഇടംപിടിച്ചു. എം എ യൂസഫലിക്ക് 7.6 ബില്യൻ ഡോളർ ആസ്തിയാണുള്ളത്. 2023-ൽ യൂസഫലിയുടെ ആസ്തി 7.1 ബില്യൻ ഡോളർ ആയിരുന്നു. ജോയ് ആലുക്കാസ് (4.4 ബില്യൻ ഡോളർ), ഡോ. ഷംഷീർ വയലിൽ (3.5 ബില്യൻ ഡോളർ), രവി പിള്ള (3.3 ബില്യൻ ഡോളർ), സണ്ണി വർക്കി (3.3 ബില്യൻ ഡോളർ) എന്നിവർ രണ്ട് മുതൽ നാല് വരെ സ്ഥാനങ്ങളിൽ ഇടംനേടിയിട്ടുണ്ട്.
സാറ ജോർജ് മുത്തൂറ്റാണ് പട്ടികയിലെ സമ്പന്ന വനിത.ഇതാദ്യമായാണ് ഒരു മലയാളി വനിത ഫോർബ്സ് അതിസമ്പന്ന പട്ടികയിൽ ഇടംപിടിക്കുന്നത്. 1.3 ബില്യൻ ഡോളർ ആസ്തിയാണ് ഇവർക്കുള്ളത്.