ന്യൂഡൽഹി: കേന്ദ്ര ആഭ്യന്തര മന്ത്രി അമിത് ഷായുമായി കൂടിക്കാഴ്ച നടത്തി ശിരോമണി അകാലിദൾ പ്രസിഡന്റും എംപിയുമായ സുഖ്ബീർ സിങ് ബാദൽ. ഇന്ത്യ-കാനഡ തർക്കം അടിയന്തരമായി പരിഹരിക്കണമെന്ന് അദ്ദേഹം അമിത് ഷായോട് ആവശ്യപ്പെട്ടു. വിസ നൽകുന്നത് നിർത്തിയത് ഗുരുതരമായി ബാധിക്കുമെന്നും അദ്ദേഹം അറിയിച്ചു.
കാനഡയിൽ താമസിക്കുന്ന ഇന്ത്യൻ വംശജരെയാണ് ഇന്ത്യയും കാനഡയും തമ്മിലുള്ള നിലവിലെ സാഹചര്യം ബാധിക്കുന്നത്. ജനങ്ങൾക്കിടയിൽ പരിഭ്രാന്തിയുണ്ടാകുന്ന അവസ്ഥയാണ് രൂപപ്പെടുന്നത്. കേന്ദ്രസർക്കാർ ഉടൻ പരിഹാരം കാണണം. ഇക്കാര്യം കേന്ദ്ര ആഭ്യന്തര മന്ത്രി അമിത് ഷായോട് അഭ്യർഥിച്ചിട്ടുണ്ടെന്നും കനേഡിയൻ പൗരന്മാർക്ക് ഇന്ത്യയിലേക്കുള്ള വിസ സേവനങ്ങൾ നിർത്തിവച്ചതിൽ ആശങ്കയുണ്ടെന്നും അദ്ദേഹം വ്യക്തമാക്കി.
ഈ നടപടി ഇന്ത്യൻ വംശജരോ ആ രാജ്യത്തെ വിദ്യാർഥികളായോ താമസിക്കുന്ന ലക്ഷക്കണക്കിനു പഞ്ചാബികളെ ബാധിക്കും. വിദ്യാർഥികളായി കാനഡയിലേക്കു പോകുന്ന, ഇപ്പോൾ അവിടെ താമസിക്കുന്ന യുവാക്കളെയും ഈ തീരുമാനം ബാധിക്കും. കാനഡയിലെ പഞ്ചാബികളിൽ നിന്നും അവരുടെ കുടുംബങ്ങളിൽ നിന്നും നാട്ടിലുള്ള അവരുടെ ബന്ധുക്കളിൽ നിന്നും സുരക്ഷിതവും സുഗമവുമായ യാത്ര ഉറപ്പാക്കാൻ ഇടപെടൽ തേടി കോളുകളും സന്ദേശങ്ങളും എത്തുന്നുണ്ടെന്നും ബാദൽ കൂട്ടിച്ചേർത്തു.