കൊച്ചി: സിനിമാ മേഖലയില് ലഹരി വസ്തുക്കളുടെ ഉപയോഗം ഉണ്ടെന്നും വിലക്കിയ യുവതാരങ്ങളിലൊരാള് ലഹരിക്കടിമയാണെന്നും ഫിലിം ചേംബര്. കഴിഞ്ഞ ദിവസം ചേര്ന്ന സിനിമാസംഘടനകളുടെ യോഗത്തിലാണ് ശ്രീനാഥ് ഭാസിയെയും ഷെയ്ന് നിഗമിനെയും വിലക്കിയതായി അധികൃതര് അറിയിച്ചത്.
അതേസമയം, ലഹരി ഉപയോഗിക്കുന്ന താരങ്ങളുടെ പട്ടിക സര്ക്കാരിന് നല്കുമെന്ന നിര്മ്മാതാക്കളുടെ പ്രസ്താവനയില് ഫെഫ്ക അതൃപ്തി രേഖപ്പെടുത്തി.
നിര്മാതാക്കളുടെ സംഘടനയായ കേരള ഫിലിം പ്രൊഡ്യൂസേഴ്സ് അസോസിയേഷന്, സാങ്കേതിക പ്രവര്ത്തകരുടെ സംഘടനയായ ഫെഫ്ക, താരസംഘടനയായ അമ്മ എന്നിവരുടെ സംയുക്ത യോഗത്തിലായിരുന്നു ശ്രീനാഥ് ഭാസിക്കും ഷെയിന് നിഗത്തിനും വിലക്ക് ഏര്പ്പെടുത്താന് തീരുമാനമുണ്ടായത്. പ്രസ്തുത സംഘടനകളുടെ മാതൃസംഘടനയാണ് ഫിലിം ചേംബര്.