തിരുവനന്തപുരം വെള്ളനാട് കരടി കിണറ്റില് വീണ് ചത്ത സംഭവത്തില് വനംവകുപ്പിനെതിരെതിരെ മുന് കേന്ദ്രമന്ത്രിയും പരിസ്ഥിതി പ്രവര്ത്തകയുമായ മേനക ഗാന്ധി രംഗത്ത്.
‘കേരളത്തിലേത് ഏറ്റവും മോശം വനംവകുപ്പാണ്. ചത്തത് അത്യപൂര്വം ഇനത്തില്പ്പെട്ട കരടിയാണ്. കരടിയുടെ മരണത്തിന് ഇടയാക്കിയ ഉദ്യോഗസ്ഥര്ക്കെതിരെ നടപടി വേണം. കരടിയെ വെടിവച്ച ഉദ്യോഗസ്ഥനെ അറസ്റ്റ് ചെയ്യണം. സംഭവിച്ചത് നാണക്കേടാണ്’- മേനക ഗാന്ധി പ്രതികരിച്ചു.
അതേസമയം, വെള്ളത്തില് മുങ്ങാന് സാധ്യതയുള്ള ജീവികളെ വെടിവയ്ക്കരുതെന്ന മാനദണ്ഡം ലംഘിച്ചുവെന്നാണ് ചീഫ് വൈല്ഡ് ലൈഫ് വാര്ഡന്റെ പ്രാഥമിക റിപ്പോര്ട്ടില് വ്യക്തമാക്കുന്നത്. വൈല്ഡ് ലൈഫ് വാര്ഡന്റെ സാന്നിധ്യം ഉണ്ടായില്ലെന്നും, രക്ഷാദൗത്യ നടപടികളില് മാനദണ്ഡങ്ങള് കൃത്യമായി പാലിച്ചില്ലെന്നും, മയക്കുവെടിവച്ച കരടി വെള്ളത്തിലേക്ക് വീണിട്ടും ആന്റിഡോട്ട് പ്രയോഗിച്ചില്ലെന്നും റിപ്പോര്ട്ടില് ചൂണ്ടിക്കാട്ടുന്നു. വീഴ്ചയുടെ ആഘാതത്തില് കരടിയുടെ ആന്തരികാവയവങ്ങളിലടക്കം വെള്ളംകയറി. മയക്കുവെടിക്കുശേഷം അന്പതുമിനിറ്റോളം വെള്ളത്തില് കിടന്നെന്നും റിപ്പോര്ട്ടില് പറയുന്നു.