Politics (Page 431)

തിരുവനന്തപുരം: നിയമസഭ തെരഞ്ഞെടുപ്പിൽ സംസ്ഥാനത്ത് ഏറ്റവും കൂടുതൽ പണം ലഭിച്ച പാർട്ടി സിപിഎം. 58 കോടി രൂപയാണ് തെരഞ്ഞെടുപ്പ് കാലത്ത് സിപിഎമ്മിന് ലഭിച്ചതെന്നാണ് തെരഞ്ഞെടുപ്പ് കമ്മീഷന് സമർപ്പിച്ച കണക്കുകളിൽ വ്യക്തമാക്കിയിട്ടുള്ളത്. രണ്ടാം സ്ഥാനത്താണ് കോൺഗ്രസുള്ളത്. 39 കോടി രൂപയാണ് കോൺഗ്രസിന് സംഭാവനയായി ലഭിച്ചത്. ബിജെപിയ്ക്ക് എട്ടു കോടി രൂപ സംഭാവനയായി ലഭിച്ചു. മുഹമ്മദിന് റിയാസിന് വേണ്ടിയാണ് സിപിഎം കൂടുതൽ പണം ചെലവഴിച്ചത്. 22 ലക്ഷം രൂപയാണ് റിയാസിന് വേണ്ടി സിപിഎം ചെലവഴിച്ചത്. ഷാഫി പറമ്പിലിനും വിടി ബൽറാമിനും വേണ്ടിയായിരുന്നു കോൺഗ്രസ് ഏറ്റവും അധികം തുക ചെലവഴിച്ചത്.

പരസ്യത്തിന് വേണ്ടി മാത്രം സിപിഎം 17 കോടി രൂപ ചെലവഴിച്ചു. സ്ഥാനാർഥികൾക്കായി 4.21 കോടി നൽകി. പോസ്റ്ററുകൾക്ക് മാത്രമായി 89 ലക്ഷം ചെലവാക്കി. ആർ ബിന്ദുവിന് വേണ്ടി 20 ലക്ഷവും വീണ ജോർജിന് 19 ലക്ഷം, ജെയ്ക്ക് സി തോമസ് 16 ലക്ഷം രൂപയും ചെലവഴിച്ചു.

അതേസമയം കോൺഗ്രസ് 23 കോടി പ്രചാരണത്തിനും 11 കോടി സ്ഥാനാർഥികൾക്ക് വേണ്ടിയും ചെലവഴിച്ചു. സ്ഥാനാർഥികളിൽ കോൺഗ്രസ് കൂടുതൽ പണം ചെലവഴിച്ചത് പാലക്കാട് മണ്ഡലത്തിൽ നിന്ന് മത്സരിച്ച് വിജയിച്ച ഷാഫി പറമ്പിലിന് വേണ്ടിയാണ്. 23 ലക്ഷമാണ് ഇവിടെ കോൺഗ്രസ് ചിലവഴിച്ചത്. വിടി ബൽറാമിന് വേണ്ടി 18.5 ലക്ഷം രൂപ ചെലവഴിച്ചു. ബിജെപി എ ക്ലാസ് മണ്ഡലങ്ങൾക്കായി 15 ലക്ഷം രൂപയാണ് നീക്കിവെച്ചിരുന്നത്. രണ്ട് മണ്ഡലങ്ങളിൽ മത്സരിച്ച കെ സുരേന്ദ്രന് 40 ലക്ഷം രൂപ ബിജെപി നൽകി. സ്ഥാനാർഥികൾക്കായി ആകെ നൽകിയത് 9 കോടി 18 ലക്ഷം രൂപയാണ്. വിമാന യാത്രയ്ക്കും ഹെലികോപ്ടർ യാത്രയ്ക്കുമായി രണ്ടേമുക്കാൽ കോടി രൂപയും ബിജെപി ചെലവിട്ടു. പ്രധാനമന്ത്രി നരേന്ദ്ര മോദി പങ്കെടുത്ത റാലികൾക്കായി 43 ലക്ഷവും യോഗി ആദിത്യനാഥിനായി 25 ലക്ഷം രൂപയും ബിജെപി ചെലവിട്ടു.

കോഴിക്കോട്: നിയമസഭാ തെരഞ്ഞെടുപ്പിൽ സിറ്റിംഗ് സീറ്റുകളിലുൾപ്പെടെയുണ്ടായ തോൽവിയിൽ അച്ചടക്ക നടപടിയുമായി മുസ്ലീം ലീഗ്. തെരഞ്ഞെടുപ്പിലെ തോൽവിയ്ക്ക് കാരണം സംഘടനാ സംവിധാനത്തിലെ പാളിച്ചയാണെന്നാണ് മുസ്ലീം ലീഗ് ഉപസമിതി റിപ്പോർട്ട്. കോഴിക്കോട് സൗത്തിലും അഴീക്കോടും ഏകോപനത്തിലെ പിഴവും വിഭാഗീയതയും തിരിച്ചടിയായെന്നും റിപ്പോർട്ടിൽ ചൂണ്ടിക്കാട്ടിയിട്ടുണ്ട്. നവംബർ 27 ചേരുന്ന ഉന്നതാധികാര സമിതിയിലാണ് സംഘടനാ നടപടി പ്രഖ്യാപിക്കുന്നത്.

നാല് സിറ്റിംഗ് സീറ്റുകളിലുൾപ്പെടെ 12 നിയമസഭ മണ്ഡലങ്ങളിലെ തോൽവിയെകുറിച്ച് പഠിച്ച ശേഷമാണ് ഉപസമിതി റിപ്പോർട്ട് സമർപ്പിച്ചിരിക്കുന്നത്. കോഴിക്കോട് സൗത്തിൽ ഏകോപനക്കുറവുണ്ടായതും ഒരു വിഭാഗം പ്രവർത്തകർ പ്രവർത്തിക്കാത്തതും തെരഞ്ഞെടുപ്പിൽ തിരിച്ചടിയായി. മണ്ഡലം കമ്മിറ്റി പിരിച്ചുവിടാൻ ഉപസമിതി ശുപാർശ ചെയ്തിട്ടുണ്ട്. കുറ്റ്യാടിയിലും വിഭാഗീയതയുണ്ടായി റിപ്പോർട്ടിൽ പറയുന്നു. പാറയ്ക്കൽ അബ്ദുളള 333 വോട്ടുകൾക്കാണ് കുറ്റ്യാടിയിൽ പരാജയപ്പെട്ടത്. വേളം പഞ്ചായത്ത് കമ്മിറ്റിക്കെതിരെ നടപടി വേണമെന്നും ശുപാർശയുണ്ട്.

അഴീക്കോട് യുഡിഎഫ് തെരഞ്ഞെടുപ്പ് കമ്മിറ്റി സംവിധാനം തന്നെ പാളിയെന്നും തെരഞ്ഞെടുപ്പിന് തൊട്ടുപിറകെ മണ്ഡലത്തിന്റെ ചുമതല വഹിച്ച കോൺഗ്രസ് നേതാവ് എൻസിപിയിലേക്ക് പോയെന്നും റിപ്പോർട്ടിൽ പറയുന്നുണ്ട്. യൂത്ത് ലീഗ് നേതാവ് പി കെ ഫിറോസ് മത്സരിച്ച താനൂരിലും സ്ഥിതി സമാനമായിരുന്നു. ഇവിടെ ബിജെപി വോട്ടുകൾ ഇടതുമുന്നണിയിലേക്ക് പോയെന്നും റിപ്പോർട്ടിൽ ചൂണ്ടിക്കാട്ടുന്നു. തിരുവമ്പാടിയിൽ ക്രിസ്ത്യൻ വോട്ടുകൾ ക്രോഡീകരിക്കാൻ പ്രവർത്തകർക്കായില്ല. വി കെ ഇബ്രാഹം കുഞ്ഞിന്റെ മകൻ മത്സരിച്ച കളമശ്ശേരിയിൽ ഒരുവിഭാഗം നേതാക്കൾ പ്രചാരണത്തിൽ നിന്നുവിട്ടു നിന്നത് തിരിച്ചടിയായെന്നും റിപ്പോർട്ടിലുണ്ട്.

പാലക്കാട്: പോലീസിനെതിരെ ഗുരുതര ആരോപണവുമായി ബിജെപി സംസ്ഥാന അദ്ധ്യക്ഷൻ കെ സുരേന്ദ്രൻ. ആർഎസ്എസ് തേനാരി മണ്ഡൽ ബൗദ്ധിക് പ്രമുഖ് സഞ്ജിത്തിന്റെ കൊലപാതകകേസ് അന്വേഷിക്കുന്നതിൽ പോലീസിന് ഗുരുതരവീഴ്ച സംഭവിച്ചതായാണ് അദ്ദേഹത്തിന്റെ ആരോപണം.

സംഭവ സ്ഥലത്ത് ഉണ്ടായിരുന്ന പോലീസുകാരൻ ഇതുസംബന്ധിച്ച് അറിയിച്ചിട്ടും ദേശീയപാതയിൽ വാഹനപരിശോധന നടത്തിയില്ലെന്ന് അദ്ദേഹം കുറ്റപ്പെടുത്തി. റോഡുകൾ ഉൾപ്പെടെ എല്ലായിടത്തും സിസിടിവികൾ ഉണ്ടായിട്ടും അവ പരിശോധിക്കുന്നതിൽ വീഴ്ച്ച പറ്റിയെന്നും സംഭവം നടന്ന് അഞ്ചു ദിവസം കഴിഞ്ഞാണ് വാഹനത്തിന്റെ ഫോട്ടോ പുറത്തുവിട്ടതെന്നും അദ്ദേഹം പറഞ്ഞു. സഞ്ജിത്തിന്റെ വീട് സന്ദർശിച്ച ശേഷം മാദ്ധ്യമങ്ങളോട് സംസാരിക്കുവെയാണ് അദ്ദേഹത്തിന്റെ പ്രതികരണം.

വധഭീഷണിയുണ്ടായിട്ടും അന്വേഷണം നടത്താൻ പോലീസ് തയ്യാറായില്ല. മുമ്പ് സഞ്ജിത്തിനെ കൊലപ്പെടുത്താൻ ശ്രമിച്ചവരെ നിരീക്ഷിക്കാനോ അവരെ സംബന്ധിച്ച് അന്വേഷിക്കാനോ പോലീസ് തയ്യാറായിട്ടില്ല. സർക്കാർ അനാസ്ഥയാണ് ഇതിന് കാരണമെന്നും സിപിഎമ്മിന്റെ സമ്മർദ്ദമാണ് ഇതിന് പിന്നിലെന്ന് വ്യക്തമാണെന്നും അദ്ദേഹം വ്യക്തമാക്കി. പ്രതികളെ പിടികൂടുന്നതിൽ പോലീസ് മെല്ലപ്പോക്ക് നയമാണ് സ്വീകരിക്കുന്നതെങ്കിൽ അമ്മമാരെ ഉൾപ്പെടെ അണിനിരത്തി സംസ്ഥാനവ്യാപകമായി ജനകീയ പ്രക്ഷോഭം നടത്തുമെന്നും കെ സുരേന്ദ്രൻ കൂട്ടിച്ചേർത്തു.

കണ്ണൂർ: കേന്ദ്ര സർക്കാർ വിവാദ കാർഷിക നിയമങ്ങൾ പിൻവലിക്കുന്നതിൽ പ്രതികരണവുമായി കെപിസിസി അധ്യക്ഷൻ കെ.സുധാകരൻ. രാജ്യത്തെ കർഷകർക്കു മുന്നിൽ നരേന്ദ്ര മോദിയെന്ന ഫാഷിസ്റ്റ് ഭരണാധികാരിക്ക് മുട്ടുമുടക്കേണ്ടി വന്നത് ജനാധിപത്യത്തിന്റെ വിജയമാണെന്ന് അദ്ദേഹം പറഞ്ഞു. കണ്ണൂരിൽ ജില്ലാ കോൺഗ്രസ് നേതൃയോഗം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.

കർഷകരുടെ സമര ഭൂമിയിൽ നിന്ന് നരേന്ദ്ര മോദിയുടെ പതനം ആരംഭിച്ചിരിക്കുകയാണ്. ഇനി അതു രാജ്യമാകെ ആളിപ്പടരുകയാണ്. കർഷകരെ കോർപറേറ്റുകൾക്ക് തീറെഴുതാനുള്ള മോദി സർക്കാരിന്റെ അജണ്ടയാണ് ജനാധിപത്യ ശക്തികൾ പൊളിച്ചടുക്കിയതെന്നും പാർലമെന്റിനകത്തും പുറത്തും കർഷകർക്കൊപ്പം നിന്ന് കോൺഗ്രസ് ശക്തമായ പോരാട്ടമാണ് നടത്തിയതെന്നും അദ്ദേഹം വ്യക്തമാക്കി. വിവിധ സംസ്ഥാനങ്ങളിൽ നടന്ന തെരഞ്ഞെടുപ്പുകളിലുണ്ടായ തിരിച്ചടിയും വരാൻ പോകുന്ന തിരഞ്ഞെടുപ്പ് ലക്ഷ്യംവെച്ചുള്ള പിൻവാങ്ങലുമാണിത്. കർഷകരുടെ കരുത്തുറ്റ സമരത്തിന് മുന്നിൽ മുട്ട് മടക്കേണ്ടിവന്ന ഏകാധിപതിയാണ് മോദിയെന്നും അദ്ദേഹം അഭിപ്രായപ്പെട്ടു.

ഗാന്ധിയൻ മൂല്യങ്ങൾ ഉൾക്കൊണ്ട് സമാധാനപൂർവം നടത്തിയ സമരത്തെ ചോരയിൽ മുക്കി കൊല്ലാൻ ഭരണകൂടം പലതവണ ശ്രമിച്ചുവെന്ന് സുധാകരൻ കുറ്റപ്പെടുത്തി. അപ്പോഴൊക്കെ ആത്മസംയമനം പാലിച്ച കർഷകരുടെ പോരാട്ടത്തിന് സമാനതകളില്ലാത്ത വീര്യമാണ് ഉണ്ടായതെന്ന് അദ്ദേഹം ചൂണ്ടിക്കാട്ടി. കോൺഗ്രസിനെ ശക്തിപ്പെടുത്താൻ എല്ലാ പ്രവർത്തകരും സജ്ജരാകണം. മോദി സർക്കാരിന്റെയും പിണറായി സർക്കാരിന്റെയും കഴിഞ്ഞ കാല ജനവിരുദ്ധ നടപടികൾ ജനങ്ങളിലെത്തിക്കുവാൻ പ്രാദേശികമായി പൊതുയോഗങ്ങൾ സംഘടിപ്പിച്ചും ജനകീയ പ്രശ്നങ്ങളിൽഇടപെട്ട് ജനവിശ്വാസം ആർജ്ജിക്കണം ഇതിനായിരിക്കണം പ്രവർത്തകർ പ്രാമുഖ്യം നൽകേണ്ടതെന്നും അദ്ദേഹം കൂട്ടിച്ചേർത്തു.